कांग्रेस महाधिवेशन: थपियो मतदानको समय ९ बजेसम्म, अझै २५०० बढी भोट खस्न बाँकी

काठमाडौं । नेपाली कांग्रेसको १४ औँ महाधिवेशनअन्तर्गत नेतृत्व चयनका लागि भृकुटीमण्डपमा  मतदान जारी छ ।

केन्द्रीय निर्वाचन समितिले  साँझ ५ बजेसम्म मतदान गर्ने समय निर्धारण गरेको भएपनि बिहान मतदान सुरु हुन ढिलाई  भएपछि निर्वाचन समितिले राति ९ बजेसम्मको समय थप गरेको हो । विहान ८ बजेबाट मतदान हुने भनिएको भए पनि मतपत्र छपाईमा ढिला भएका कारण करिब साढे ११ बजेबाटमात्रै मतदान सुरू भएको थियो ।
निर्वाचन समितिका संयोजक गोपालकृष्ण घिमिरेले सोमबार राति ९ बजेसम्म मतदान गर्ने समय थप गरिएको जानकारी दिए । समितिका अनुसार दिउँसो ४ः३० बजेसम्म एक हजार ९९३ मत खसेको छ।भृकुटीमण्डप परिसर, भृकुटीमण्डप प्रदर्शनी कक्ष र राष्ट्रियसभा परिसर गरी ३ स्थानमा निर्वाचन सुरू भएको छ । राष्ट्रिय सभागृहमा केन्द्रीय कार्यसमिति, जनसम्पर्क समिति, भ्रातृ एवं शुभेच्छुक संस्था, कर्णाली प्रदेश र लुम्विनी प्रदेशका मतदाताले मतदान गर्दैछन् ।

भृकुटीमण्डप परिसरमा प्रदेश २ र गण्डकी प्रदेशका मतदाताका लागि मतदान केन्द्र तोकिएको । त्यस्तै प्रदर्शनी कक्षमा प्रदेश १, वागमती र सुदूरपश्चिम प्रदेशका महाधिवेशन प्रतिनिधिहरूले मतदान गर्नेछन् ।

निर्वाचन समितिले २९ प्रकारका मतपत्र तयार गरेको छ । सबै मतपत्रका लागि अलग–अलग मतपेटिका राखिएको छ ।

यो महाधिवेशनले १३ पदाधिकारीसहित १३४ पदमा नयाँ नेतृत्व चयन गर्नेछ । निर्वाचनमा ४ हजार ७ सय ४३ जना प्रतिनिधि सहभागी छन् ।