भट्टराई भन्छन्: यो सरकारबाट मामली र ससुराली खुशी भए होलान् तर जनता खुशी छैनन्

काठमाडाैं । नेकपा एमालेका सदस्य खिमलाल भट्टराईले असार २८ मा शेरबहादुर देउवालाई प्रधानमन्त्री बनाउने गरी भएको सर्वोच्च अदालतबाट भएको परमादेशको पोल खुलिसकेको बताएका छन् ।

आज (सोमबार) को राष्ट्रियसभा बैठकमा बोल्दै उनले यस्ताे बताएका हुन् ।

‘यो सरकार आएर मामली र ससुराली खुशी भए होला’, उनले भने, ‘तर यो सरकारबाट जनताले केही अपेक्षा गरेका छैनन् ।’ 

‘परमादेश कसरी आयो भन्ने पनि प्रमाणित भएको छ’, उनले भने, ‘परमादेश जारी हुनु र सर्वोच्चको फैसला आजको राजनीतिक घटना क्रमले स्पष्ट पारेको छ ।’

उनले परमादेशको ढाकछोपका लागि एकजना मन्त्रीले राजीनामा दिएर नहुने बताए । ‘अब पोल खुलिसकेको छ । यही नाटकबाट देश चल्छ ?’, उनले भने, ‘लोकतन्त्र विस्तारै कमजोर हुँदै गएको छ । देश सरकारविहीन अवस्थामा छ । यो सरकारले के गर्छ र माग पनि गर्नु जनताले ?’

उनले प्रधानमन्त्री देउवा सुत्ने बाहेक केही काम नगरेको बताए । ‘प्रधानमन्त्री देउवा बूढानीलकण्ठबाट बालुवाटार आएर सुत्ने काम गरेका छन्’, उनले भने, ‘उनी घरी घरी उठ्छन् अनि हाम्रा राम्रा काम भत्काउँछन् । यो सरकारले न कान सुन्छ, न हेर्न सक्छ न काम नै गर्न सक्छ ।’