मन्त्री गजेन्द्र हमालकै सेटिङमा हेमकर परिवारका हत्यारा सोनीलाई ९ महिनामै सर्वोच्चबाट उन्मुक्ति

काठमाडौं । प्रधानमन्त्री शेरबहादुर देउवाले आज उद्योग, बाणिज्य तथा आपूर्ति मन्त्रीमा नियुक्त गरेका गजेन्द्र हमाल मुद्दाको बिचौलियासमेत भएको खुलेको छ । प्रधानन्यायाधीश चोलेन्द्रशमशेर राणाका जेठान हमालले ज्वाई न्यायाधीश भएदेखि नै मुद्दाको बिचौलियाको काम गर्ने गरेको स्रोत बताउँछ । राणा पुनरावेदन हुँदै विशेष अदालत, सर्वोच्च अदालतको न्यायाधीश र प्रधानन्यायाधीश भएपछि त झन् उनले ठूला ठूला मुद्दाको बिचौलियाको काम गर्दैआएका छन् ।

बाँकेका हमालले १६ बर्षअघि नेपालगंजको सदरलाइनस्थित आफ्नै घरमा हत्या गरिएका दीपक हेमकर परिवारका ५ सदस्यको हत्याका मुख्य आरोपी किशोरीलाल सोनीलाई पक्राउ परेको ९ महिनामै साधारण तारिखमा छुटाएका थिए । ठूलो आर्थिक लेनदेनमा ५ जनाको सामूहिक हत्या गरेका किशोरीलाल सोनीलाई हमालले नै ज्वाई राणा प्रधानन्यायाधीश भएको बेला २०७६ असार २७ मा सर्वोच्च अदालतबाट साधारण तारिखमा छुटाएका थिए । २०७५ असोज १३ मा प्रहरीले लखनउबाट पक्राउ गरी ल्याएका हेमकार परिवार हत्याका मुख्य अपराधी सोनीलाई सर्वोच्च अदालतले २०७६ असार २७ मा फाष्टट्रयाकमा सुनुवाई गर्दै साधारण तारिखमा छाडेको थियो ।  

दीपक हेमकारसहित उनको परिवारका ५ जनाको २०६२ साल फागुन ११ गते बाँके नेपालगञ्जको सदरलाइनस्थित आफ्नै घरमा हत्या गरिएको थियो ।  

सुन व्यापारी ३२ वर्षीय दीपक हेमकर, उनकी हजुरआमा ८२ वर्षीय गुलावदेवी हेमकर, बुबा ६२ वर्षीय जगदेव हेमकर, आमा ४५ वर्षीया सीतादेवी हेमकर र उनीहरूको घरमा काम गर्ने १५ वर्षीय रामशनिश्चर चौधरीको घाँटी रेटेर हत्या भएको थियो । उक्त हत्या दीपक हेमकरका ससुरा किशोरीलाल सोनीकै योजनामा भारतबाट कन्ट्याक्ट किलर ल्याएर गरिएको थियो ।

प्रहरी अनुसन्धानकै क्रममा दीपक हेमकारकै श्रीमती दीपा सोनी र ससुरा किशोरीलाल सोनीको संलग्नतामा हत्या गरिएको अनुसन्धानमा खुल्यो । हत्याको पछाडि दीपकको सम्पत्ति लुटपाटको उद्देश्य रहेको थियो । दीपककी श्रीमती दीपा सोनीले नेपालगंजमा रहेको घर र अन्य सम्पत्ति बेचबिखन गरी भारत गइसकेकाले पनि हेमकार परिवारको हत्याका पछाडि सुनचाँदी र अन्य सम्पत्ति लुटपाटको उद्देश्य नै रहेको थियो । 

यस्तो जघन्य हत्यामा संलग्न मुख्य अपराधी सोनीलाई नेपाल प्रहरीको केन्द्रीय अनुसन्धान ब्यूरो(सीआइबी)ले अथक मेहनत गरी १३ बर्षपछि २०७५ साल असोज १३ गते भारतको लखनउबाट पक्राउ गरी नेपाल ल्याएको थियो । सीआइबीले तरकारी बिक्रीकर्ताको भेषमा किशोरीलाल सोनीको रेकी गरी पक्राउ गरेको थियो । प्रहरीलाई पक्राउ गर्नासाथ सोनीले १ करोड भारु घुसको प्रस्ताव गरेका थिए । तर प्रहरीले घुसको पर्वाह नगरी पक्राउ गरी नेपाल ल्यायो । तर सर्वोच्च अदालतले आजन्म कैदको संजाय दिनुपर्नेमा ९ महिनामै साधारण तारिखमा छाडेर प्रहरीको मेहनतमा पानी खन्याइदिएको थियो । 

लखनउ सीतापुरका सोनीलाई सीआइबीले नेपालमा ल्याइसकेपछि जिल्ला अदालत बाँकेले २०७५ साल कात्तिक १४ गते पुर्पक्षका लागि थुनामा पठाउने आदेश दिएको थियो । त्यसपछि सोनीले उच्च अदालत दाङम साधारण तारेखमा रही मुद्दाको पुर्पक्ष गर्न पाउन माग गर्दै निवेदन दिए । उच्च अदालत दाङको नेपालगञ्ज इजलासले २०७५ साल पुस २६ गते जिल्ला अदालत बाँकेको पुर्पक्षमा राख्ने आदेश सदर गर्यो । नेपालगंज उच्च अदालतको आदेशविरुद्ध सोनीले २०७५ चैत ५ गते सर्वोेच्च अदालतमा कारागार बाहिरैबाट मुद्दाको पुर्पक्ष गर्न पाउनुपर्ने माग गर्दै निवेदन दिएका थिए । जुन मुद्दामा न्यायाधीशद्वय ईश्वरप्रसाद खतिवडा र पुरुषोत्तम भण्डारीले साधारण तारिखमा छाड्ने आदेश दिएका थिए ।

साधारण तारिखमा छुटेपछि सोनी भारततर्फ फरार भए । किशोरीलालले सोनीले ज्वाई दीपक हेमकारसहित उनको परिवारका ५ जनाको बर्बरपूर्वक हत्या गरी दसौं करोड बराबरको सुनचाँदीदेखि नेपालगंजको घरजग्गा समेत बिक्री गरी भारत लगिसकेका थिए । नेपालबाट साधारण तारिखमा छुटकारा पाएमात्रै भारतमा गएपछि केही नहुने भएकाले सोनीका मानिसहरुले गजेन्द्र हमालसँग पटक पटक भेटे । मोलमोलाई भयो । र, अन्ततः ६ करोडमा साधारण तारिखमा रहेर मुद्दा लड्न पाउनेगरी सोनीलाई सर्वोच्चले छाड्यो ।

सोनीले दीपक हेमकार परिवारको हत्यामात्र गरेनन्, उनको सबै सम्पत्ति पनि भारत पुर्याइसकेका छन् । यस्ता जघन्य अपराधमा संलग्न सोनीलाई आजन्म कैद संजाय हुनुपर्नेमा हमालले प्रधानन्यायाधीश राणासँग सेटिङ गरी पक्राउ परेको ९ महिनामै साधारण तारिखमा छ्ुटाउन सफल भएको नेपालगंजबासीलाई पनि थाहा छ । सोनीका बिरुद्ध भारतमै व्यक्तिहत्या, हत्याको प्रयास, डाका र चोरीको मुद्दा चलिरहेको छ । 

किशोरीलाल सोनीको फोटो रातोपाटी डटकमबाट साभार गरिएको हो ।