एजेन्सी। यूईएफए च्याम्पियन्स लिग २०२१-२२ अन्तर्गत समूह चरणको पहिलो खेलमा म्यानचेस्टर युनाइटेडले स्विस टोली योङ ब्वाइजसँग हारको सामना गरेको छ ।
मंगलबार राति योङ ब्वाइजको घरेलु मैदानमा भएको खेलमा दश खेलाडीमा सिमित रहेको युनाइटेड २-१ ले पराजित भएको हो ।
पोर्चुगिज फरवार्ड क्रिस्टियानो रोनाल्डोले पहिलो हाफमा अग्रता दिलाएपनि युनाइटेड पहिलो हाफमा १० खेलाडीमा सिमित भएपछि खेलमा पकड गुमाउन पुगेको थियो ।
खेलको १३ औं मिनेटमा नै युनाइटेडले रोनाल्डोको गोलमा अग्रता लिएको थियो । २५ औं मिनेटमा डिफेन्डर आरोन वान बिसाकाले रातो कार्ड पाएपछि युनाइटेड १० खेलाडीमा सिमित भयो ।
दोस्रो हाफको ६६ औं मिनेटमा निकोलस गमालेउले गोल गर्दै खेल बराबरीमा ल्याए ।
इन्ज्युरी समयको पाँचौ मिनेटमा युनाइटेडका लिंगार्डले गम्भीर गल्ती गरेपछि योङ ब्वाइज अग्रता लिन सफल भएको थियो । यस जितसँगै समूह एफमा योङ ब्वाइज ३ अंक जोड्न सफल भएको छ ।
