ललिता निवास जग्गा प्रकरण खोतल्ने कोइरालाको राजीनामा

काठमाडौं, २२ फागुन ।

सरकारी, सार्वजनिक र गुठी जग्गा संरक्षण सम्बन्धी जाँचवुझ आयोगका कानूनी सल्लाहकार युवराज कोइरालाले राजीनामा दिएका छन् । 

उनले दिएको राजीनामा मन्त्रिपरिषदको आइतबार बसेको बैठकले स्वीकृत गरेको छ । ललिता निवास बालुवाटारको १ सय १४ रोपनी जग्गा गैरकानुनी रुपमा शोभाकान्त ढकाल, रामकुमार सुवेदीहरुले दर्ता गरेको बिषयमा पहिलो पटक सार्वजनिक रुपमा बहसमा ल्याउने काम कोइरालाले नै गरेका थिए ।

कोइरालाले नै तत्कालीन गृहसचिव प्रेमकुमार राईलाई ललिता निवासको बारेमा जानकारी गराएपछि पूर्व सचिव शारदाप्रसाद त्रिताल नेतृत्वको छानबिन समिति बनाइएको थियो । त्रिताल समितिले ललिता निवासको जग्गा सरकारकै भएको र सरकारी जग्गा गैरकानुनी रुपमा दर्ता गर्ने गराउनेहरुमाथि अख्तियार दुरुपयोग अनुसन्धान आयोग र नेपाल प्रहरीको सीआइबीबाट कारबाही गर्नुपर्ने प्रतिवेदन दिएको थियो । सरकारले त्यही प्रतिवेदनका आधारमा अख्तियार र सीआइबीलाई कारबाही गर्न निर्देशन दिएको थियो । र, अख्तियारले ललिता निवास जग्गा प्रकरणमा संलग्न पूर्वउपप्रधानमन्त्री बिजय गच्छदारसहित १ सय ७५ जनाबिरुद्ध गएको माघ २२ मा विशेष अदालतमा मुद्दा दायर गरिसकेको छ । 

ललिता निवासको जग्गा प्रकरण लगत्तै सरकारी, सार्वजनिक र गुठी जग्गा संरक्षण सम्बन्धी जाँचवुझ आयोग गठन भएको थियो । उक्त आयोगमा कोइरालालाई सरकारले कानूनी सल्लाहकारमा नियुक्त गरेको थियो । आयोगको कानुनी सल्लाहकार भएपछि आफ्नाबारेमा भूमाफियाहरुले अफवाह फैलाएकाले राजीनामा दिएर पुनः सरकारी जग्गा संरक्षणका लागि आवाज उठाउने बताएका छन् ।