निर्वाचन आयोगले झलनाथ खनालको सनाखतलाई मान्यता दियो, रेशम चौधरीको सनाखत भएन

काठमाडाैं । नेकपा एकीकृत समाजवादी पार्टी दर्ताका लागि नेता झलनाथ खनालले नयाँदिल्लीस्थित नेपाली दूतावासमार्फत गरेको हस्ताक्षर स्वीकार भएको छ । 

खनाल स्वास्थ्य उपचारका लागि दिल्लीमा रहेका कारण सनाखतका लागि निर्वाचन आयोगमा उपस्थित हुन नसकेपछि उनले दूतावासमार्फत सनाखत गरेका हुन् ।

एमाले विभाजन गरी एकीकृत समाजवादी पार्टी दर्ता गर्न नेताहरुले दिएको निवेदनमा निर्वाचन आयोगले बुधबार केन्द्रीय सदस्यहरुलाई सनाखत गर्न बोलाएको थियो । 

रेशम चौधरीको सनाखत भएन

यता लोकतान्त्रिक समाजवादी पार्टी दर्ताका लागि भने सांसद रेशम चौधरीको हस्ताक्षर भने सनाखत भएन ।

आयोगका प्रवक्ता राजकुमार श्रेष्ठका अनुसार महन्थ ठाकुर पक्षले निर्वाचन आयोगमा दिएको दल दर्ता निवेदनमा चौधरीको नाम समावेश नभएकाले उनको हस्ताक्षर सनाखत नभएको हाे ।

भदौ २ गते महन्थ ठाकुरले दल दर्ताका लागि दिएको निवेदनमा चौधरीको नाम समावेश भएपनि भदौ ४ गतेकाे  संशोधनमा चौधरीको नाम नराखिएको भन्दै सनाखत नभएको श्रेष्ठले बताए ।

चौधरी टीकापुरमा भएको थारु समुदायको आन्दोलनका क्रममा सुरक्षाकर्मीसहित ८ जना मारिएको घटनामा दोषी ठहर भई हाल डिल्लीबजार कारागारमा रहेका छन् ।