महाधिवेशनको दौडधुप: विमलेन्द्र, शशांक र प्रकाशमानबीच आज लञ्च मिटिङ

काठमाडौं । नेपाली कांग्रेसका नेताहरुलाई आसन्न १४औँ महाधिवेशनका लागि नेताहरुले दौडधुप थालेका छन् । 

आउँदो भदौ १६ देखि १९ गतेसम्म १४औँ महाधिवेशन हुने कार्यतालिका सार्वजनिक भएसँगै कांग्रेसका नेताहरु आन्तरिक छलफलमा जुटेका छन् । विशेषगरी महाधिवेशनमा सभापतिका दाबेदारहरु आन्तरिक छलफलमा जुटेका हुन् । 

यसैक्रममा कांग्रेसका उपसभापति विमलेन्द्र निधि, महामन्त्री डा. शशांक कोइराला र पूर्वमहामन्त्री प्रकाशमान सिंहबीच मंगलबार फेरि लञ्च मिटिङ हुने भएको छ ।

उपसभापति निधि निवासबाट सुरु भएको लञ्च मिटिङ कोइराला निवास हुँदै आज चाक्सीबारीमा हुन लागेको हाे । सिंह निवास चाक्सीबारीमा दिउँसो लञ्चसहित छलफल हुन लागेको स्राेतले जानकारी दिएकाे छ ।

आसन्न महाधिवेशनमा सभापतिका आकांक्षी तीनै जनाले सहमतीमा नेतृत्व चयन गर्ने गरी छलफललाई निरन्तरता दिएका छन् ।

कांग्रेसमा पारिवारिक लिगेसी बोकेका निधि, कोइराला र सिंहबीचको निरन्तरको छलफलले पार्टीभित्र तरंग ल्याएको छ ।

पार्टीभित्र फरक गुटमा रहेका शशांक, विमलेन्द्र र प्रकाशमानको निरन्तरको छलफललाई कतिपयले नयाँ समीकरण निर्माणका रुपमा पनि लिने गरेका छन् ।