पारिश्रमिक नदिएको गुनासो आएपछि महासंघले भोलिदेखि सञ्चार गृह अनुगमन गर्ने

काठमाडौं । कोरोनाभाइरस संक्रमणको महामारीका बेला काममा खटिएका  श्रमजीवि पत्रकारलाई पारिश्रमिक नदिएको, कामबाट निकालेकोजस्ता गुनासो आएपछि नेपाल पत्रकार महासंघ अनुगमनमा निस्कने भएको छ । 

महासंघले आइतबार प्रेस विज्ञप्ति जारी गरेर सोमबारबाट सञ्चार गृहमा अनुगमनमा जाने जानकारी दिएको हो ।  

‘कोरोना संक्रमणलाई बहाना बनाउँदै केही सञ्चार गृहहरुले श्रमजीवि पत्रकारहरुलाई कामबाट हटाउने, पारिश्रमिक नदिने, पारिश्रमिक घटाउने र बेतलबी बिदा दिनेजस्ता क्रियाकलाप बढाएकोप्रति नेपाल पत्रकार महासंघको गम्भीर ध्यानाकर्षण भएको छ,’ महासचिव रोशन पुरीले जारी गरेको विज्ञप्तिमा भनिएको छ । 

श्रमजीवि पत्रकारलाई कामबाट हटाउने कार्य तत्काल रोक्न, पारिश्रमिक नपाएका पत्रकारलाई नियमित पारिश्रमिक उपलब्ध गराउन, खाइपाइ आएको पारिश्रमिक नघटाउन र बेतलबी बिदामा नराख्न पनि महासंघले भनेको छ ।