​​​​​​​किन फिर्ता भए राजदूत पौडेल ?

काठमाडौं, १९ फागुन । सरकारले चीनका लागि नेपाली राजदूत लीलामणि पौड्याललाई फिर्ता बोलाएको छ । नेपाल कम्युनिष्ट पार्टीका कार्यकारी अध्यक्ष पुष्पकमल दाहाल ‘प्रचण्ड’ र बरिष्ठ नेता माधवकुमार नेपालसमेतलाई पौड्याललाई राजदूतबाट फिर्ता बोलाई पाण्डेलाई पठाइएको बारेमा थाहा थिएन । आइतबार साँझ बालुवाटारमा बसेको मन्त्रिपरिषद् बैठकले पौडेललाई फिर्ता बोलाउने निर्णय गरेको हो ।

बैठकले पौडेलको ठाउँमा पूर्वपरराष्ट्रमन्त्री महेन्द्रबहादुर पाण्डेको नाम सिफारिस गरेको थियो । उक्त मन्त्रिपरिषद बैठकमा प्रधानमन्त्री केपी शर्मा ओलीले पौड्याललाई फिर्ता बोलाउने र पाण्डेलाई पठाउने प्रस्ताव राखेका थिए ।

 पौड्याल नेपाली कांगे्रसको समर्थनमा प्रचण्ड प्रधानमन्त्री हुँदा तत्कालीन माओवादी कोटाबाट राजदूत नियुक्त भएका थिए । तर उनलाई कार्यकाल पूरा नै हुन नदिई फिर्ता बोलाइएको छ । 

पूर्वमुख्यसचिव पौडेल निजामती प्रशासनमा स्वच्छ छवि कायम राखी अवकाश भएका थिए । उनी देखेको कुरा स्पष्ट बोल्न सक्ने र क्षमतावान भनेरै तत्कालीन माओवादी नेतृत्वले उनलाई राजदूतका रुपमा चीनमा पठाएको थियो । तर माओवादी र एमाले गाभिएर बनेको नेकपाकै सरकारले उनलाई कार्यकाल पूरा नगरी फिर्ता बोलाएको छ । किन फिर्ता बोलाइयो भन्ने समेत उनलाई प्ुर्वजानकारी नदिएको गुनासो उनले गरेका छन् । आफूलाई फिर्ता बोलाइएको कुरा उनले मिडियामा आएपछि मात्र थाहा पाएको प्रतिक्रिया दिएका छन् ।  राजदूत पौडेललाई नेपाल आउन १५ दिनको समय दिइएको छ । 

महेन्द्रबहादुर पाण्डेलाई ओलीले नै २०७३ मा प्रधानमन्त्री हुँदा चीनको राजदूतमा नियुक्तिका लागि सिफारिस गरेका थिए । तर संसदीय सुनुवाइमा जाने बेलामा प्रचण्ड प्रधानमन्त्री भएपछि उनीसहित जापानका लागि नियुक्त खडग केसीलगायतको नाम फिर्ता लिइएको थियो ।