कोरला नाकाबाट भित्रिएका सामान चोभारमै जाँचपास गर्न सकिने

काठमाडौँ । चीनसँगको कोरला नाकाबाट भित्रिएका वस्तुको भन्सार जाँचपास अब काठमाडौँस्थित चोभार सुक्खा बन्दरगाह भन्सार कार्यालयबाट गर्न सकिने भएको छ।

भन्सार विभागले मुस्ताङ भन्सार कार्यालयमा पैठारीका लागि आएका वस्तुलाई त्यहाँ जाँचपास नगरी आन्तरिक परिवहन सुविधामार्फत सिधै चोभार ल्याउन सकिने व्यवस्था गरेको हो। विभागले सामान ढुवानी गर्ने सवारीसाधनका लागि सडक मार्गसमेत निर्धारण गरेको छ।

विभागका अनुसार भन्सार नियमावलीमा तोकिएका सर्त, प्रक्रिया तथा अन्य व्यवस्था पालना गर्ने गरी आन्तरिक परिवहनको सुविधा दिइएको हो। यो व्यवस्था अर्को निर्णय नभएसम्म लागू हुनेछ।

यससँगै कोरला नाकाबाट भित्रिएका सामान मुस्ताङ भन्सार कार्यालयमै जाँचपास गर्नुपर्ने बाध्यता हटेको छ। निर्धारित प्रक्रिया पूरा गरेर सामान चोभार सुक्खा बन्दरगाहसम्म ल्याई जाँचपास गर्न सकिनेछ।

विभागले मालवाहक सवारीसाधनका लागि कोरला नाकादेखि चोभारसम्मको मुख्य सडक मार्ग तय गरेको छ।

कोरलाबाट प्रवेश गरेका मालवाहक सवारी नेचुङ-छुसाङ-कागबेनी-जोमसोम-बेनीकुस्मा-पोखरा-दमौली-मुग्लिङ-कुरिनटार-नौबिसे-कलंकी हुँदै चोभारस्थित सुक्खा बन्दरगाह भन्सार कार्यालय पुग्नुपर्नेछ।

मुख्य रुटमा समस्या आएमा मालवाहक सवारीले वैकल्पिक मार्ग प्रयोग गर्न पाउने व्यवस्था गरिएको छ। त्यस्ता सवारी मुग्लिङ-नारायणघाट-हेटौँडा-भैंसे-नौबिसे- कलंकी-चोभार हुँदै सुक्खा बन्दरगाह पुग्न सक्नेछन्।

गुडाएर ल्याइने नयाँ सवारीसाधनका लागि भने तत्काललाई हेटौँडातर्फको रुट निर्धारण गरिएको छ।

प्रलयकारी बाढीले रसुवागढी नाका तहसनहस बनाएपछि मुस्ताङस्थित कोरला नाकालाई वैकल्पिक व्यापारिक मार्गका रूपमा प्रयोग गर्न थालिएको छ। कोरलाबाट हुने आयातलाई सहजीकरण गर्न विभागले आन्तरिक परिवहन र चोभारमा जाँचपासको व्यवस्था मिलाएको हो।