रसुवा बाढी: पोखरामा पनि पहिचान नभएका शवको व्यवस्थापन सुरू

काठमाडौँ। रसुवा बाढीमा परेर विभिन्न जिल्लामा फेला परेर पोखरा ल्याइएका पहिचान नभएका ७८ वटा शव बुधबार पोखरा( १६ दिपस्थित सेती नदी किनारमा व्यवस्थापन सुरू भएको छ । तनहुँ, गोरखा,धादिङ जिल्लास्थित त्रिशूली नदी क्षेत्रबाट र नवलपुरको नारायणी नदीबाट उद्धार गरेर १०२ जनाको शव पोखरा ल्याइएको थियो ।

पोखरा स्वास्थ्य विज्ञान प्रतिष्ठानमा ल्याइएको शवमध्ये पहिचान नभएका ७८ जनाको शव बुधबार व्यवस्थापन भएको हो । पहिचान भएका १९ जनाको शव आफन्तलाई बुझाइको जिल्ला प्रहरी कार्यालय कास्कीका प्रमुख नवीन कार्कीले जानकारी दिए ।

दुईजना विदेशीजस्तो देखिन र आफन्तले आफ्नो भएको बताइएका ३ जनाको शव गरी पाँचजनाको शव पोखरा स्वास्थ्य विज्ञान प्रतिष्ठानमा राखिएको पनि कास्की प्रहरी प्रमुख कार्कीले बताए ।

पोखरा ल्याइएका सबै शवको पोष्टमार्टम र डीएनए नमूना संकलन गरी संकेत नम्बरको आधारमा अभिलेख राखेपछि पहिचान नभएका ७८ जनाको शव जमिन मुनी व्यवस्थापनको काम सुरू गरिएको कास्कीका सहायक प्रमुख जिल्ला अधिकारी चित्रांगत बरालले बताए ।