त्रिशूली-३ ‘बी’ सुरुङमा चार स्थानबाट ड्रिलिङ पूरा, आजै प्रवेश गरी उद्धारको तयारी

काठमाडौँ। त्रिशूली-३ ‘बी’ जलविद्युत् आयोजनाको सुरुङमा फसेका श्रमिकको खोज तथा उद्धारका लागि फ्रन्ट फेसबाट चारवटा प्वाल ड्रिलिङ गर्ने काम सम्पन्न भएको छ।

ऊर्जा, जलस्रोत तथा सिँचाइमन्त्री विराजभक्त श्रेष्ठको सचिवालयका अनुसार ड्रिलिङबाट प्राप्त प्रगतिलाई आधार बनाएर अब फ्रन्ट फेसबाटै सुरुङभित्र प्रवेश गरी खोज तथा उद्धार अघि बढाउने तयारी भइरहेको छ।

उद्धार अभियानलाई सुरक्षित र प्रभावकारी बनाउन आवश्यक प्राविधिक तयारीसँगै सम्बन्धित निकायबीच समन्वयको काम पनि निरन्तर भइरहेको सचिवालयले जनाएको छ।

सुरुङभित्रको अवस्था पहिचान तथा प्रवेशका लागि आवश्यक प्राविधिक प्रक्रिया अघि बढेसँगै उद्धार टोलीलाई सुरुङभित्र पठाउने तयारी गरिएको हो।