चीनको सिचुआनमा ५.१ म्याग्निच्युडको भूकम्प गयो

काठमाडौं । चीनको भूकम्प नेटवर्क केन्द्रका अनुसार शुक्रबार चीनको दक्षिण-पश्चिमी प्रान्त सिचुआनमा ५.१ म्याग्निच्युडको भूकम्प गएको छ ।

भूकम्प सिचुआनको लोङचाङ सहरमा गएको हो, जुन नेपाल–तिब्बत सीमा नजिकैको बाढी प्रभावित क्षेत्रभन्दा सयौँ माइल टाढा पर्छ । भूकम्पबाट तत्काल कुनै हताहती वा ठूलो क्षतिको विवरण प्राप्त भएको छैन ।

यसै साताको सुरुमा सीमा क्षेत्रमा आएको विनाशकारी बाढी र पहिरोपछि तिब्बत र नेपालमा उद्धार तथा राहत कार्य जारी रहेकै बेला यो भूकम्प गएको हो ।

चिनियाँ राष्ट्रपति सी चिनफिङले शुक्रबार तिब्बतमा भइरहेको उद्धार कार्यबारे शीर्ष अधिकारीहरूसँगको बैठकको अध्यक्षता गरेका छन् । अधिकारीहरूले हिमताल, हिमनदी र भौगर्भिक विपद्‌बाट निरन्तर जोखिम रहेको चेतावनी दिएका छन्, जसले गर्दा उद्धार कार्य थप जटिल बनिरहेको छ ।

अघिल्लो विपद् गएको स्थानमा पानीको सतह बढेपछि नेपालले पनि बाढीको नयाँ चेतावनी जारी गरेको छ ।