रसुवा बाढी: नेपाली सेनाद्वारा ८०२ जनाको उद्धार

काठमाडौँ । रसुवामा आएको बाढीबाट प्रभावित ८०२ जनाको उद्धार गरिएको छ। नेपाली सेनाले बुधबार बिहानदेखि अपराह्न साढे ३ बजेसम्म ५० विदेशीसहित ६०२ जनाको हवाई तथा २०० जनाको जमिनी उद्धार गरेको हो।

सेनाका हेलिकप्टरमार्फत टिमुरे, स्याफ्रुबेँसी, धुन्चे र मैलुङ क्षेत्रबाट प्रभावितहरूको उद्धार गरिएको छ।

वीरेन्द्र अस्पतालबाट चिकित्सक अधिकृतसहित खटिएको मेडिकल टोलीले त्रिशूलीमा स्थापना गरेको आपत्कालीन उपचार केन्द्रबाट ३३८ जना घाइतेलाई उपचार प्रदान गरेको छ।

खोज तथा उद्धारमा ड्रोन र सैनिक कुकुरसमेत परिचालन गरिएको छ। नेपाली सेनाका चार हजार दुई सयभन्दा बढी जनशक्तिले समन्वयात्मक रूपमा घाइतेको खोज तथा उद्धार, आपत्कालीन उपचार र राहत सामग्री वितरण गरिरहेका छन्।

सेनाको टोली धादिङस्थित पृथ्वी राजमार्गमा जमेको लेदो हटाएर सडक सञ्चालनमा ल्याउने कार्यमा समेत खटिएको छ।