आयल निगमको कार्यकारी निर्देशकमा नागेन्द्र साह नियुक्त

काठमाडौं । नेपाल आयल निगमको कार्यकारी निर्देशकमा नागेन्द्र साह नियुक्त भएका छन् । बुधबार बसेको मन्त्रिपरिषद बैठकले साहलाई निगमको कार्यकारी निर्देशकमा नियुक्त गरेको हो । साह निगमकै उच्चतहका कर्मचारी हुन् ।

निगमको कार्यकारी निर्देशकका लागि तीन जनाको नाम आइतबार(साउन १७ गते) उद्योग, बाणिज्य तथा आपूर्ति मन्त्रालयका सचिव नेतृत्वको छनोट सिफारिस समितिले बुझाएको थियो ।

बुधबार बसेको मन्त्रिपरिषद बैठकले साहलाई निगमको कार्यकारी निर्देशक नियुक्त गरेको बिहीबार संचारमाध्यममा आएको छ । तर सरकारका प्रवक्ता शिक्षा तथा खेलकुद मन्त्री सस्मित पोखरेलले लगानीबोर्डको अध्यक्षमा यांकी उक्याबको नियुक्तिको निर्णय भएको बताए पनि निगममा नियुक्तिका बारेमा केही पनि उल्लेख गरेका थिएनन् ।

छनोट समितिले निगमको कार्यकारी निर्देशका लागि कौशल केसी, नागेन्द्र साह र संजीवकुमार देवलाई सिफारिस गरेको छ ।

निगम गएको बैशाख ३० गतेदेखि नेतृत्वबिहीन थियो ।