काँग्रेस नेता अभिषेक गिरीविरुद्ध २१ करोड ठगी आरोपमा मुद्दा दर्ता

काठमाडौँ । नेपाली काँग्रेसका नेता अभिषेक गिरीविरुद्ध २१ करोड रुपैयाँभन्दा बढी रकमको ठगीसम्बन्धी अभियोगमा जिल्ला अदालत काठमाडौँमा मुद्दा दर्ता भएको छ ।

प्रहरीको केन्द्रीय अनुसन्धान ब्युरो (सीआईबी)ले गरेको अनुसन्धानका आधारमा सरकारी वकिलको कार्यालयले गिरीविरुद्ध कानुनी प्रक्रिया अघि बढाउँदै अभियोग पत्र दायर गरेको हो ।

अदालतका सूचना अधिकारी शिव खतिवडाका अनुसार गिरीविरुद्ध २१ करोड ३२ लाख ७६ हजार ५ रुपैयाँ बराबरको बिगो कायम गरी मुद्दा पेश गरिएको छ । हाल अदालतमा उनको बयान प्रक्रिया जारी रहेको जानकारी दिएका छन् ।

व्यवसायी सुभाष श्रेष्ठले दिएको उजुरीका आधारमा गिरीलाई नियन्त्रणमा लिएर सीआईबीले अनुसन्धान थालेको थियो । अनुसन्धानका क्रममा श्रेष्ठको बुढानीलकण्ठस्थित घरजग्गा तथा सवारीसाधनसम्बन्धी विषयमा गिरीमाथि अनियमितता तथा कब्जा गरेको आरोप लागेको छ ।