एमाले–माओवादीको एकता खारेज गर्ने फैसला पुनरावलोकनको माग गर्दै प्रचण्ड सर्वोच्चमा

काठमाडौं । एमाले–माओवादी केन्द्रको एकता खारेज गर्ने गएको फागुन २३ को फैसलाबिरुद्ध माओवादी केन्द्रका अध्यक्ष पुष्पकमल दाहाल ‘प्रचण्ड’ पुनरावलोकनको निवेदन लिएर सर्वोच्च पुगेका छन् ।

उनी मंगलबार बिहान ११ बजे नेकपा एमाले र नेकपा माओवादी केन्द्रबीचको एकता खारेज गर्ने सर्वोच्च अदालतको फैसलाविरुद्ध पुनरावलोकनको निवेदन दिन सर्वोच्च अदालत पुगेका हुन् ।

सर्वोच्च अदालतका न्यायाधीशद्वय कुमार रेग्मी र बमकुमार श्रेष्ठको संयुक्त इजलासले गएको फागुन २३ मा नेकपाको आधिकारिकता ऋषि कट्टेललाई दिएको थियो भने एमाले–माओवादीको एकता खारेज गरी २०७५ जेठ २ कै अवस्थामा पुर्याएको थियो ।

एमाले–माओवादी केन्द्रको एकता खारेजको माग ऋषि कट्टेलले गरेका थिएनन् । नमागेको बिषयमा अदालतले आदेश दिएका कारण प्रधानमन्त्री केपी ओलीलाई त्यसले प्रत्यक्ष लाभ पुर्याएको छ । प्रतिनिधिसभा पुनस्र्थापना गर्ने सर्वोच्चको फैसलाले उत्साहित भएका प्रचण्ड र माधव नेपाल अप्ठेरोमा परेका छन् ।