कर्मचारीमाथि कुटपिटको आरोपमा पर्साका वडाध्यक्ष पक्राउ

काठमाडौँ । पर्साको कालिकामाई गाउँपालिका-३ का वडाध्यक्ष सञ्जय पटेललाई गाउँपालिकाका एक कर्मचारीमाथि कुटपिट तथा दुर्व्यवहार गरेको आरोपमा प्रहरीले पक्राउ गरेको छ।

जिल्ला प्रहरी कार्यालय पर्साका अनुसार इलाका प्रहरी कार्यालय पोखरियाको टोलीले मंगलबार वडाध्यक्ष पटेललाई उनकै गाउँ हरिहरपुर बिर्ताबाट नियन्त्रणमा लिएको हो।

प्रहरीले गाउँपालिकाको कार्यालयभित्र कर्मचारीमाथि भएको कुटपिट घटनासम्बन्धी अभद्र व्यवहार कसुरमा अनुसन्धान अघि बढाइएको जनाएको छ। जिल्ला प्रहरी कार्यालय पर्साका प्रवक्ता तथा प्रहरी नायब उपरीक्षक (डीएसपी) चक्र मल्लका अनुसार पक्राउ परेका पटेललाई आवश्यक कानुनी प्रक्रियाका लागि जिल्ला प्रशासन कार्यालयमा उपस्थित गराइने तयारी गरिएको छ।

गत असार २३ गते कालिकामाई गाउँपालिकाको कार्यपालिकाको कार्यालयभित्र कम्प्युटर अपरेटर चन्दनकुमार चौरसियामाथि कुटपिट तथा दुर्व्यवहार भएको आरोप लागेको थियो।

उक्त घटनापछि गाउँपालिकाका कर्मचारीहरूले दोषीमाथि कानुनी कारबाहीको माग गर्दै विरोध जनाउँदै आएका थिए।

प्रहरीले घटनामा संलग्न अन्य व्यक्तिको खोजी तथा अनुसन्धानसमेत जारी रहेको जनाएको छ।