छात्रामाथि दुर्व्यवहारको आरोपमा मोरङबाट दुई शिक्षकसहित चालक पक्राउ

काठमाडौँ । मोरङको सुन्दरहरैँचा नगरपालिका-१० स्थित सुकुना माध्यमिक विद्यालयमा अध्ययनरत छात्राहरूमाथि दुर्व्यवहार गरेको आरोपमा प्रहरीले दुई शिक्षकसहित एक जना सवारी चालकलाई नियन्त्रणमा लिएको छ ।

पक्राउ पर्नेमा सुन्दरहरैँचा-१० का ४० वर्षीय प्रदीप भट्टराई, सुन्दरहरैँचा(२ का ३० वर्षीय किशोरलाल गच्छदार र सुन्दरहरैँचा-१२ का ३५ वर्षीय अबिरल मास्के रहेको मोरङ प्रहरीले जनाएको छ ।

जिल्ला प्रहरी कार्यालय मोरङका सूचना अधिकारी डीएसपी मकेन्द्रकुमार मिश्रका अनुसार पक्राउ परेकामध्ये भट्टराई विद्यालयका सवारी चालक तथा गच्छदार र मास्के शिक्षक हुन् ।

विद्यार्थीहरूले आरोपित व्यक्तिहरूविरुद्ध विरोध कार्यक्रम गर्ने तयारी गरेपछि प्रहरीले घटनाबारे अनुसन्धान अघि बढाउँदै उनीहरूलाई पक्राउ गरेको जनाएको छ ।

प्रहरीका अनुसार केही छात्रालाई मोबाइलमार्फत व्यक्तिगत सन्देश पठाउने, परीक्षामा सफल बनाइदिने प्रलोभन दिने तथा मर्यादा विपरीत व्यवहार गरेको सूचनाका आधारमा अनुसन्धान प्रक्रिया सुरु गरिएको हो ।

घटनामा यौनजन्य दुर्व्यवहारको सम्भावनासमेतलाई ध्यानमा राखेर अनुसन्धान अघि बढाइएको प्रहरीले जनाएको छ । डीएसपी मिश्रले घटनासम्बन्धी थप तथ्य संकलन गर्ने काम भइरहेको जानकारी दिए ।