सशस्त्र प्रहरीको टोलीद्वारा मलंगवा र हरिपुरबाट तस्करीको काठ र लत्ताकपडा बरामद

काठमाडौं । सर्लाहीको मलंगवा नगरपालिका–२ स्थित सीमा इलाकाबाट असार २१ गते सशस्त्र प्रहरीले २३ लाख रुपैयाँ बराबरको काठसहित गाडी नियन्त्रणमा लिएको छ ।

साथै उक्त काठ लैजान लागेका गोरखा जिल्ला घर बताउने अन्दाजी ३५ बर्षीय डोरबहादुर उपरकोटी र भारत घर बताउने अन्दाजी २८ बर्षीय मुकेश शर्मा छन् ।

नेपालबाट अवैध रुपले प्र. २–०४–००१ च ००९३ नम्बरको पिकअप गाडीमा राखेर भारततर्फ लैजान लागेको एक सय क्यूफिट काठ र एक थान बक्स पलङसहित उनीहरुलाई सशस्त्र प्रहरी बल नेपाल सीमा सुरक्षा गुल्म मलंगवाले नियन्त्रणमा लिएको हो ।

नियन्त्रणमा लिइएका दुवै जनालाई बरादम काठ तथा गाडीसहित आवश्यक कारबाहीका लागि डिबिजन वन कार्यालय लालबन्दी सर्लाहीमा बुझाइएको छ ।

यसैगरी सोही जिल्लाको हरिपुर नगरपालिका–३ धनकौलाबाट असार २१ गते करीव ९७ लाख २० हजार रुपैयाँ बराबरको कत्ताकपडा बरामद गरिएको छ ।

सोही ठाउँको कपडा पसलमा उक्त लत्ताकपडा अवैध रुपले लुकाई छिपाई राखेको भन्ने विशेष सूचनाको आधारमा सशस्त्र प्रहरी बल नेपाल सीमा सुरक्षा गुल्म मलंगवा र जिल्ला प्रशासन कार्यालय सर्लाहीको संयुक्त टोलीले बरामद गरेको हो ।

बरामद लत्ताकपडा आवश्यक कारवाहीका लागि भन्सार कार्यालय सर्लाहीमा बुझाइएको छ ।