१२ बर्षे छोराको मोबाइलमा कटुवा पेस्तोल देखिएपछि बाबु–छोरा पक्राउ, पेस्तोल घरको भित्ताबाट बरामद

सर्लाही । सर्लाहीको मलंगवामा ट्राफिक चेकिङको क्रममा प्रहरीले कटुवा पेस्तोलसहित दुई जनालाई नियन्त्रणमा लिएको छ । पक्राउ पर्नेमा मलंगवा नगरपालिका–६, सुखैनियाका मोहन पासवान र उनका छोराका रुपमा रहेका रामहुलास पासवान रहेका छन् ।

सर्लाहीको मलंगवा नगरपालिका–८ स्थित गोरखकाली प्रहरी चौकीअगाडि संयुक्त प्रहरी टोलीले चेकजाँच गर्ने क्रममा भारतको नम्बर प्लेट (BR 30A 1071) भएको मोटरसाइकल जाँच गर्दा चालक मोहन पासवानसँग सवारीसम्बन्धी कागजपत्र फेला परेन । उनले कागज मोबाइलमा रहेको भन्दै देखाउन खोज्दा उनका १२ बर्षीय छोरा नवल पासवानको मोबाइलमा कटुवा पेस्तोल ताकिरहेको फोटो भेटिएको प्रहरीले जनाएको छ ।

उक्त विषयमा सोधपुछ गर्दा मोहन पासवानले ती फोटोमा देखिएको व्यक्ति आफ्नै छोरासमेत रहेका रामहुलास पासवान भएको खुलाएपछि प्रहरीले थप अनुसन्धान अघि बढाएको थियो । त्यसपछि जिल्ला प्रहरी कार्यालय सर्लाहीबाट खटिएको प्रहरी टोलीले रामहुलासलाई पनि नियन्त्रणमा लिएको थियो ।

रामहुलासले पेस्तोल घरकै पूर्वपट्टि भित्तामा कपडाले बेरिएको अवस्थामा राखेको बताएका थिए । प्रहरीले उनको भनाइअनुसार त्यहाँबाट कटुवा पेस्तोल बरामद गरेको छ ।

हाल दुवैलाई आवश्यक अनुसन्धानको लागि सर्लाही जिल्ला अदालतबाट पाँच दिनको म्याद थप गरी हिरासतमा राखिएको प्रहरीले जनाएको छ ।