असाधारण बजेट कार्यान्वयनको प्रयास गरिएको अर्थमन्त्री वाग्लेको दाबी

काठमाडौँ । अर्थमन्त्री डा. स्वर्णिम वाग्लेले आगामी आर्थिक वर्षको बजेटमार्फत सरकारको आर्थिक व्यवस्थापन तथा कार्यान्वयन प्रणालीमा गुणात्मक सुधारको प्रयास गरिएको बताएका छन्।

उनले लामो समयदेखि बजेट कार्यान्वयन प्रभावकारी हुन नसकेको धारणा परिवर्तन गर्ने उद्देश्यसहित यस पटक विशेष पहल गरिएको दाबी गरे।

आइतबार अर्थ मन्त्रालयमा आयोजित पत्रकार सम्मेलनमा मन्त्री वाग्लेले आफूले मन्त्रालय सम्हालेपछि सबै मन्त्रालयलाई सशक्त र प्रभावकारी बनाउन प्रशासनिक तथा संरचनागत सुधारका काम अघि बढाइएको जानकारी दिए। उनका अनुसार सरकारी निकायहरूको कार्यक्षमता अभिवृद्धि गरी बजेट कार्यान्वयनलाई गति दिने दिशामा समन्वयात्मक प्रयास गरिएको छ।

उनले भौतिक पूर्वाधार क्षेत्रतर्फ पुँजीगत बजेट खर्चको अवस्था कमजोर रहेको उल्लेख गर्दै ठूलो बजेट विनियोजन भए पनि खर्च न्यून हुने समस्या देखिएको बताए। सो समस्या समाधानका लागि सम्बन्धित निकायहरूलाई पुँजीगत खर्च बढाउन स्पष्ट निर्देशन दिइएको उनले जानकारी गराए। उनका अनुसार भौतिक मन्त्रालयमा हाल करिब २४ देखि २५ प्रतिशत मात्र पुँजीगत खर्च हुने अवस्था रहेको छ।

मन्त्री वाग्लेले १५ जेठमा २१ खर्ब २४ अर्ब रुपैयाँ बराबरको आगामी आर्थिक वर्षको बजेट सार्वजनिक गरिएको स्मरण गर्दै यसको प्रभावकारी कार्यान्वयनमार्फत आर्थिक गतिविधि सुदृढ बनाउने सरकारको लक्ष्य रहेको स्पष्ट पारे।