प्रतिनिधिसभाको पहिलो बैठक आजदेखि, कार्यसूचीमा सभामुखको निर्वाचनदेखि अध्यादेशसम्म

काठमाडौं । गएको २१ फागुनमा भएको प्रतिनिधिसभा सदस्य निर्वाचनबाट निर्वाचित जनप्रतिनिधिको पहिलो बैठक आजदेखि बस्दैछ । राष्ट्रपति रामचन्द्र पौडेलको आह्वानमा आज २ बजेबाट संघीय संसद्को अधिवेशन सुरु हुन लागेको हो ।

संघीय संसद सचिवालयले प्रतिनिधिसभाको पहिलो बैठकका ८ वटा कार्यसूची तय गरेको छ । आजको बैठकबाटै सभामुख चयन प्रक्रिया सुरु हुने संसद् सचिवालयले जनाएको छ । सभामुख चयन भएपछि बल्ल उपसभामुख चयनको प्रक्रिया सुरु हुने सचिवालयको भनाइ छ ।

बुधबार प्रतिनिधिसभामा प्रतिनिधित्व गर्ने राजनीतिक दलहरूबीच संसद्को पहिलो बैठकमै सभामुखको निर्वाचनसम्बन्धी प्रस्ताव प्रस्तुत गर्ने सहमति जुटेको छ । सभाका ज्येष्ठ सदस्य अर्जुननरसिंह केसीको अध्यक्षतामा सिंहदरबारमा बसेको दलका प्रतिनिधिको बैठकले सभामुख चयन प्रक्रिया तत्काल थाल्ने सहमति गरेको थियो ।

सहमतिअनुसार २० गते मनोनयन र २२ गते निर्वाचनको कार्यतालिका छ । एकजनाको मात्र उम्मेदवारी दर्ता भए शुक्रबार नै प्रतिनिधिसभाले नयाँ सभामुख पाउनेछ । रास्वपाले उपसभापति डोलप्रसाद अर्याललाई सभामुखका रूपमा अघि सार्दैछ । संसदमा रास्वपाको दुईतिहाइ पुग्न २ सिट कम संख्या भएकाले अर्याल सभामुख हुने निश्चित छ ।

पहिलो बैठकमा जेनजीसहित सबै आन्दोलनका शहीदप्रति श्रद्धाञ्जली व्यक्त गर्ने र संसदमा प्रतिनिधित्व गरेका ६ वटै दलका शीर्ष नेताले शुभकामना सम्बोधन गर्ने सहमति भएको छ । दलको बैठकपछि महासचिवको हस्ताक्षरमा तय भएको सम्भावित कार्यसूचीमा राष्ट्रपति कार्यालयले पठाएको सरकार गठन र संसद् आह्वानसम्बन्धी पत्र पढेर सुनाउने, बैठकको अध्यक्षता गर्ने सदस्यको मनोनयन गर्ने कार्यसूची छ ।

बैठकमा दलीय प्रतिनिधित्वका आधारमा शुभकामना मन्तव्यपछि गृहमन्त्री सुधन गुरुङले ३ वटा अध्यादेश पेस गर्ने कार्यसूची छ । सचिवालयका अनुसार गृहमन्त्रीले मतदाता नामावली अध्यादेश, प्रतिनिधिसभा सदस्य निर्वाचन अध्यादेश र नेपाल विशेष सेवा अध्यादेश पेस गर्नेछन् ।

प्रतिनिधिसभा भंग भएयता निधन भएका विभिन्न ५ जना सांसदप्रति शोक प्रस्ताव पारित गरेर बैठक समापन गर्ने कार्यसूची छ ।

मौजुदा प्रतिनिधिसभा नियमावली प्रतिस्थापन नहुँदासम्मका लागि पुरानै नियमावलीबाट प्रतिनिधिसभा बैठक सञ्चालन गर्ने सहमति गरेको छ ।