सरकारको सय बुँदे कार्यसूचीप्रति भीम रावलको टिप्पणी, सीमा र राष्ट्रिय सुरक्षा नीतिमा किन मौन ?

काठमाडौं । नेपाली कम्युनिष्ट पार्टी(नेकपा)का नेता भीमबहादुर रावलले सरकारको शासकीय सुधारसम्बन्धी सय बुँदे कार्यसूचीको कार्यान्वयनमा सकारात्मक प्रतिक्रिया दिँदै राष्ट्रियता जस्तो संवेदनशील विषयमा मौनता देखिएको बताएका छन् ।

सामाजिक सञ्जालमा रावलले आफ्नो धारण राख्दै रावलले लेखेका छन्–सरकारले जारी गरेको कार्यसूची अभिरुचिका साथ पढियो । कार्यान्वयन भएमा धेरैजसो विषयहरू राम्रा छन् । तर विगतमा अत्यन्त चर्चित र संवेदनशील विषयमा सरकार किन नबोलेको होला भन्ने प्रश्न उठ्छ ।

उनले नेपालको राष्ट्रिय सुरक्षा नीति, सीमा सुरक्षा, संविधानको धारा ५१ (ड) अनुसारको असमान सन्धि सम्झौताको पुनरावलोकन, माथिल्लो कर्णाली जलविद्युत आयोजना र जलस्रोत व्यवस्थासम्बन्धी सरकारको मौनता औँल्याएका छन् ।

त्यसैगरी रावलले त्रिभुवन अन्तर्राष्ट्रिय विमानस्थलमा विदेशी सुरक्षा जाँच चौकी, विषादियुक्त खाद्यान्न तथा तरकारी–फलफुल परीक्षण, तरकारी र फलफुलको परीक्षण र नियन्त्रण, कृषिमा पुनः उत्पादन हुने बिउको आयात र बिगबिगी, विदेशी सवारी साधनको अनियन्त्रित आवागमन, इम्बोस्ड नम्बरमा नेपाली भाषाको प्रयोगमा रोकजस्ता संवेदनशील विषयमा पनि सरकारले कदम नचालेको टिप्पणी गरेका छन् ।

साथै उनले शिक्षा क्षेत्रमा अनियन्त्रित शुल्क, कालोबजारी, तस्करी, मूल्यबृद्धि र नेपाल कानून तथा कूटनीतिक मर्यादाविपरीतका गतिविधि पनि जारी रहेकोमा चिन्ता व्यक्त गरेका छन् ।