हामी सरकारमा जादैनौ, प्रतिपक्षी भूमिकामै केन्द्रित रहन्छौ: हर्क साम्पाङ

हामी सरकारमा जादैनौ, प्रतिपक्षी भूमिकामै केन्द्रित रहन्छौस् हर्क साम्पाङ

काठमाडौँ । श्रम संस्कृति पार्टीका अध्यक्ष हर्क साम्पाङले आफ्नो दल सरकारमा सहभागी नहुने स्पष्ट पार्दै वर्तमान जनादेश अनुसार प्रतिपक्षी भूमिकामै केन्द्रित रहने बताएका छन्।

काठमाडौँमा आज सञ्चारकर्मीसँग कुराकानी गर्दै श्रम संस्कृति पार्टीका अध्यक्षसमेत रहेका साम्पाङले जनताबाट प्राप्त मत सरकार सञ्चालनका लागि नभई प्रश्न उठाउने जिम्मेवारीका लागि भएको उनले बताए। उनका अनुसार पार्टीले सोही जनादेश अनुसार काम अघि बढाउनेछ।

सरकारमा सहभागी हुन सक्ने सम्भावनाबारे गरिएको जिज्ञासामा उनले स्पष्ट रूपमा अस्वीकार गर्दै, राम्रो कार्यलाई समर्थन र त्रुटिपूर्ण कामको आलोचना गर्ने नीति अपनाइने बताए।

साम्पाङले रवि लामिछानेलाई प्रधानमन्त्रीका रूपमा अघि सार्नुपर्ने धारणा पुनः दोहोर्‍याए। उनले प्रधानमन्त्री पदमा रहने व्यक्तिले प्रतिपक्षबाट उठाइने प्रश्नहरूको जवाफ दिन सक्ने क्षमता राख्नुपर्ने उल्लेख गरे।

आफूले पूर्वनिर्वाचन अवधिमा प्रधानमन्त्री बन्ने अभिव्यक्ति दिएको प्रसंगमा उनले त्यसलाई राजनीतिक सन्दर्भको अभिव्यक्तिका रूपमा व्याख्या गर्दै अन्ततः निर्णय जनमतबाट निर्धारण हुने बताए। उनका अनुसार हालको परिणामले आफूलाई उक्त जिम्मेवारीका लागि जनसमर्थन प्राप्त नभएको संकेत गरेको छ।

साम्पाङले मतदाताको निर्णयलाई अन्तिम मान्यता दिँदै आफू जनताभन्दा माथि नभएको र उनीहरूको अपेक्षाअनुसार नै भूमिका निर्वाह गरिने बताएका छन्।