सत्तापक्षले होटलको भाषणमा ४५ लाख उडाए, हर्कले दार्चुलामा पुल बनाउन ४५ लाख जुटाए

काठमाडौं । राष्ट्रिय स्वतन्त्र पार्टी(रास्वपा)ले पाँचतारे होटल टुलिपमा सांसदहरुलाई दिएको दुई दिने प्रशिक्षणको बिषयमा पक्ष विपक्षमा टिकाटिप्पणी भइरहेको छ । २ दिने प्रशिक्षणमा करिब ४५ लाख रुपैयाँ खर्च भएको र त्यो रकमको पारदर्शीताका बारेमा सामाजिक संजालमा प्रश्न पनि उठाइएको छ ।

पाँच तारे होटलमा प्रशिक्षण किन दिनुपर्यो ? संसदकै हलमा वा अन्यत्र पनि दिन सकिन्छ भन्ने कोणबाट प्रश्न उठेका छन् । पाँचतारे होटलमा सांसदहरुलाई दिइएको खर्च कुनै ठेकेदार वा ब्यापारीले नै दिएको होला, उसको स्वार्थ के हो ? बिचौलियासँग टाढा रहने पार्टीले पाँचतारे होटलमा गरेको खर्चको पारदर्शीता देखाउनुपर्छ कि पर्दैन भन्ने कोणबाट पनि चर्चा भइरहेको छ ।

श्रम संस्कृति पार्टीकी  नेतृ विद्या श्रेष्ठले त सत्तापक्ष रास्वपाले होटलमा ४५ लाख सकेको बताएकी छन् । उनले सत्तापक्ष रास्वपाले होटलमा ४५ लाख सक्दा प्रतिपक्षी श्रम संस्कृति पार्टीले दार्चुलामा तुईन हटाएर पुल बनाउन ४५ लाख सहयोग रकम जुटाएको उल्लेख गरेकी छन् । उनले रास्वपा र श्रम संस्कृति पार्टीमा फरक यही हो भनेकी छन् ।
सामाजिक संजालमा श्रेष्ठ लेख्छिन्–‘सत्तापक्षले महंगो होटलको भाषणमै लगभग ४५ लाख उडाएछ । प्रतिपक्षले दार्चुलाको बिकट ठाउमा तुईनको साटो झोलुङ्गे पुल बनाउन झण्डै ४५ लाख सहयोग रकम जुटाएछ । यही फरक हो ।’

श्रेष्ठ केही महिनाअघि रास्वपा छाडेर श्रम संस्कृति पार्टीमा प्रवेश गरी मकवानपुर १ बाट निर्वाचनमा उम्मेदवार थिइन् ।