सवा करोड स्रोत नखुलेको रकम र चेकबुकसहित नागार्जुनबाट दुई जना पक्राउ

काठमाडौं । नेपाल प्रहरीले काठमाडौंको भीमढुंगामा हुण्डी कारोबारीहरुबाट सवा करोड रुपैयाँसहित दुई जनालाई नियन्त्रणमा लिएको छ ।

नागार्जुन नगरपालिका–८, भीमढुंगाबाट स्थानीय २८ वर्षीय सागर गिरी र प्रमोदप्रसाद धिताल पक्राउ परेका हुन् ।

प्रहरीले उनीहरूको साथबाट विभिन्न बैंकका फरक–फरक व्यक्तिको नाममा रहेका तीन थान चेकबुक, विभिन्न व्यक्तिको नाममा काटिएका २७ लाख ३० हजार रुपैयाँ बराबरका तीन वटा चेक तथा चार वटा बैंकका एटीएम कार्ड समेत फेला पारेको जनाएको छ ।

यसका साथै एक थान नागरिकता, दुई वटा चारपाङ्ग्रे सवारी साधन, एउटा दुईपाङ्ग्रे सवारी, एक थान सवारी दर्ता किताब र विभिन्न कम्पनीका छ वटा मोबाइल फोन पनि बरामद गरिएको जिल्ला प्रहरी परिसर काठमाडौंका सूचना अधिकारी एसपी पवनकुमार भट्टराईले जानकारी दिएका छन् ।

बरामद सामग्रीमा ३१ वटा एनसेल र नेपाल टेलिकमका सिमकार्ड, एक कम्प्युटर तथा बाइनान्स खातामा रहेको ७ हजार १७५.३४ यूएसडीटी समेत रहेको भट्टराईले बताएका छन् ।

पक्राउ परेका दुवै जनामाथि जिल्ला अदालत काठमाडौंबाट पाँच दिनको म्यादथप गरी अनुसन्धान भइरहेको छ ।