वामदेव गौतमलाई प्रधानमन्त्रीको प्रस्ताव, नेकपाभित्र अर्को तरंग

काठमाडौं, १८ बैशाख । प्रधानमन्त्री तथा नेकपाका अध्यक्ष केपी शर्मा ओलीले बुधबारको सचिवालय बैठकमा पार्टी उपाध्यक्ष वामदेव गौतमलाई कोरोना महामारीपछि प्रधानमन्त्रीको उम्मेदवार बनाउने प्रस्ताव गरेपछि नेकपाभित्र राजनीतिक तरंग पैदा गरेको छ ।  

 नेकपा सचिवालयका बहुमत सदस्यले बुधबारको बैठकमा प्रधानमन्त्रीको कार्यशैलीको तिखो आलोचना हुने संभावना देखिएपछि ओलीले गौतमलाई प्रधानमन्त्री र माधव नेपाललाई तेस्रो अध्यक्षका रुपमा प्रस्ताव गरेका थिए । प्रधानमन्त्री ओलीका बिरुद्ध प्रस्तुत हुनेगरी गएका अर्का अध्यक्ष पुष्पकमल दाहाल ‘प्रचण्ड’ र सचिवालय सदस्यहरुलाई उनको प्रस्तावले ‍अप्ठेरोमा पारिदियो । कार्यकारी अध्यक्ष प्रचण्डले प्रधानमन्त्रीलाई लामो भुमिका बाँध्दै अध्यादेश र त्यसपछि सांसद अपहरणले पार्टी र सरकारको बदना भएकाले राजीनामा दिन सुझाएका थिए ।  

प्रचण्डको जवाफ दिंदै ओलीले संविधान संशोधन गरेरै बरु उपाध्यक्ष वामदेव गौतमलाई प्रधानमन्त्री बनाउने प्रस्ताव गरेका थिए । पार्टीको विधान संशोधन गरेर वरिष्ठ नेता माधवकुमार नेपाललाई तेस्रो अध्यक्ष बनाउने प्रस्ताव पनि उनले ल्याएका थिए । प्रधानमन्त्रीको यो प्रस्तावपछि  गृहमन्त्री समेत रहेका सचिवालय सदस्य रामबहादुर थापाले दुवै अध्यक्षका कुरा असान्दर्भिक र निरर्थक भएको भन्दै आक्रोस प्रकट गरेका थिए । पार्टी फुटाउन देशभित्र र बाहिर विभिन्न शक्तिको चलखेल बढिरहेकाले अनावश्यक लफडामा नफस्न थापाले खबरदारी गरेका थिए । 

प्रधानमन्त्री निवास बालुवाटारमा झन्डै ४ घन्टा बसेको सचिवालय बैठकमा राजनीतिक दल र संवैधानिक परिषद्सम्बन्धी अध्यादेश प्रकरणपछि पार्टीभित्र ओलीले पार्टी र सरकार दुवै मोर्चामा नेतृत्व दिन असफल भएको आवाज उठेको थियो । अध्यक्ष दाहालले प्रधानमन्त्री ओलीले दुवै पदबाट राजीनामा दिनुपर्ने धारणा राखेका थिए ।  बरिष्ठ नेता माधव नेपालले पनि प्रधानमन्त्री ओलीलाई राजीनामा दिन आग्रह गरेका थिए ।