धादिङ बस दुर्घटनाः २८ घाइतेको पहिचान खुल्यो, बसमा ३७ जना सवार थिए

धादिङ । धादिङको बेनीघाट रोराङ गाउँपालिका–५ भैँसीगौडामा सोमबार बिहान दुर्घटना भएको बसले पोखरादेखि ३४ जना यात्रु लिएर काठमाडौंका लागि छुटेको बताइएको छ ।

पृथ्वी राजमार्ग बस सञ्चालक समितिका अनुसार पोखराको पर्यटक बसपार्कबाट आइतबार साँझ ७ बजे छुटेको ग. १ ख १४२१ नं. उक्त बसमा ३४ यात्रुसहित चालक र दुईजना बसका कर्मचारी सवार रहेको थिए ।

‘पोखरादेखि बस छुट्दा चालक, कर्मचारीसहित बसमा ३७ जना सवार थिए, बीच बाटोमा अन्य यात्रु पनि चढेको अनुमान गरिएको छ, विस्तृत विवरण आइसकेको छैन’, समितिका अध्यक्ष ऐनबहादुर साहीले भने ।

बस दुर्घटनामा परी १७ जनाको मृत्यु भएको र २४ जना घाइते भएको जनाइएको छ । दुर्घटनाको थप विवरण आउन बाँकी छ । दुर्घटनास्थलबाट सबै घाइतेहरुको उद्धार गरिसकिएको छ ।

केही घाइतेलाई स्थानीय अस्पतालमा उपचार गरिएको छ भने अधिकांशलाई काठमाडौँ पठाइएको छ। प्रहरीले अहिलेसम्म मृतकहरुको परिचय खुलाएको छैन। घाइते २८ जनाको नामावली भने प्रहरीले सार्वजनिक गरेको छ ।