उच्च पदस्थलाई धम्क्याएको आरोपमा फिलिपिन्समा पक्राउ परेका पाठकलाई नेपाल ल्याइयो

काठमाडौं । अख्तियार दुरुपयोग अनुसन्धान आयोगका प्रमुख आयुक्त प्रेमकुमार राईसहित उच्च पदस्थ व्यक्तिहरुलाई हत्या गर्ने धम्की दिने प्रकाश पाठकलाई नेपाल ल्याइएको छ । इन्टरपोलको सहयोगमा पुस १६ गते फिलिपिन्सको राजधानी मनिलामा पक्राउ परेका पाठकलाई बुधबार नेपाल ल्याइएको हो ।

पाठकलाई नेपाल प्रहरीको टोलीले फिलिपिन्सै पुगेर नेपाल ल्याएको प्रहरीका केन्द्रीय प्रवक्ता डीआईजी अभिनारायण काफ्लेले जानकारी दिए ।

पाठकले अख्तियारकै पूर्वप्रमुख लोकमानसिंह कार्की, नेपाल आयल निगमका पूर्वकार्यकारी निर्देशक गोपाल खड्का, कांग्रेस नेता एवम् पूर्वगृहमन्त्री रमेश लेखक, सुडान काण्डमा जोडिएका तीन जना पूर्वप्रहरी प्रमुख ओमविक्रम राना, हेमबहादुर गुरुङ र रमेश चन्द ठकुरी समेतलाई धम्की दिएका थिए ।

यस्तै कांग्रेसका पूर्व सभापति शेरबहादुर देउवाकी पत्नी एवं पूर्व परराष्ट्रमन्त्री आरजु राणा, पूर्वगृहमन्त्री बालकृष्ण खाँण र मेडिकल व्यवसायी दुर्गा प्रसाईँलाई पनि ज्यान मार्ने चेतावनी दिएका थिए ।

अगस्ट १८ मा फिफिलिपिन्स गएका उनले त्यहीँबाट उनीहरूलाई ज्यान मार्ने धम्की दिएका थिए । जिल्ला प्रहरी परिसर काठमाडौँले अनुसन्धानको क्रममा उनी फिलिपिन्समा रहेको पत्ता लगाउँदै नेपाल ल्याउनका लागि इन्टरपोल शाखामार्फत प्रक्रिया अगाडी बढाएको थियो । अब उनलाई जिल्ला प्रहरी परिसर काठमाडौँको हिरासतमा राखेर अनुसन्धान अगाडी बढाउने प्रहरीको तयारी छ ।

यस प्रकरणमा ३ जना सहयोगीलाई भने प्रहरीले यसअघि नै पक्राउ गरिसकेको छ । उनीहरूले आफूहरू प्रकाशको बडिगार्ड भएको बताएका थिए ।