निर्वाचन प्रहरीको १० दिने तालिम सम्पन्न, कार्यक्षेत्रमा परिचालन गर्ने तयारी

काठमाडौँ । प्रतिनिधि सभा निर्वाचनलाई लक्षित गर्दै अस्थायी रूपमा नियुक्त गरिएका निर्वाचन प्रहरीको प्रशिक्षण कार्यक्रम देशभर सम्पन्न भएको छ। आगामी २१ फागुनमा तय गरिएको निर्वाचनका लागि सञ्चालन गरिएको १० दिने तालिम मंगलबार सकिएको हो।

तालिम समाप्त भएसँगै सम्बन्धित जनशक्ति कार्यक्षेत्रमा परिचालन हुने अपेक्षा गरिएको भए पनि आवश्यक बन्दोबस्ती सामग्री तयारी अवस्थामा नपुगेकाले केही दिन ढिलाइ हुने भएको छ। लाठी, सिट्टी, पोसाक तथा जुत्तालगायतका सामग्री उपलब्ध भइसकेपछि मात्रै उनीहरूलाई फिल्डमा खटाइने जनाइएको छ।

जिल्ला प्रहरी परिसर काठमाडौँका अनुसार आवश्यक पोसाक तयार नभएकाले तत्काल परिचालन सम्भव नभएको र सामग्री व्यवस्थापन पूरा भएपछि मात्रै खटाइने व्यवस्था मिलाइनेछ।

निर्वाचन सुरक्षाका लागि चारवटै सुरक्षा निकाय र अस्थायी निर्वाचन प्रहरीसमेत गरी कुल ३ लाख ३३ हजार ९८० जनशक्ति परिचालन गरिने तयारी छ। जसअनुसार नेपाली सेनाबाट ७९ हजार ७२७, नेपाल प्रहरीबाट ७५ हजार ५९७ तथा नेपाल प्रहरी मातहत रहने १ लाख ३० हजार ९८० निर्वाचन प्रहरी खटिनेछन्।

यसैगरी सशस्त्र प्रहरी बलबाट ३४ हजार ५७६ जना परिचालन हुनेछन् भने सशस्त्र प्रहरी मातहत रहने थप १५ हजार ११० निर्वाचन प्रहरी परिचालन गरिनेछ। साथै १ हजार ९२१ जना गुप्तचरसमेत निर्वाचन अवधिभर परिचालित हुने जनाइएको छ।

सुरक्षा निकायहरूले निर्वाचन शान्तिपूर्ण, सुरक्षित र निष्पक्ष वातावरणमा सम्पन्न गराउने उद्देश्यसहित समन्वयात्मक तयारी अघि बढाइरहेको बताएका छन्।