एकैरातमा छुटे युवराज सफल, भने–बाघलाई महिनौं खोरमा थुन्न सकिन्न

काठमाडौैं । महान्यायाधीवक्ता सबिता भण्डारी बडालको बिरुद्ध गाली बेइज्जती गरेको आरोपमा बुधबार पक्राउ परेका युवराज पौडेल सफल बिहीबार छुटेका छन् ।

उनले हिरासतमुक्त हुनासाथ कागजी बाघलाई महिनौंसम्म खोरमा थुन्न सकिन्छ तर वास्तविक बाघलाई धेरै समय खोरमा थुन्न नसकिने भन्दै सामाजिक संजालमा स्टाटस लेखेका छन् ।

आफू पक्राउ परेकोमा खुसी मानेकाहरुलाई चुनौती दिंदै उनले शाही अमेरिकी सरकारको एमसीसी विरोधी आफूलाई फसाउने मिसन असफल समेत उनले उल्लेख गरेका छन् । सफलले विश्व शक्तिले हारेको, राष्ट्र ,राष्ट्रियताले जितेको दाबी गरेका छन् ।

हिरासतमुक्त भएपछि सफलले लेखेका छन्–‘युवराज सफल नियन्त्रणमा परेको थियो जुल्फे एण्ड सुल्फे कम्पनीले भब्य खुसी मनाएछ, खसी, कुखुरा, माछा र बियर पनि खाएछ, कता कता युवराज सफल अब कयौं बर्षको लागि जेल गयो भनेर पनि लेख्न भ्याएछन् । तर २४ घण्टामा युवराज सफल हिरासतमुक्त भएपछि युवराज सफल कसरी जेलमुक्त भयो भनेर जुल्फे एण्ड सुल्फे कम्पनीमा रोइकराई छ ।

जसरी बिर्को लागेको बट्टाभित्रको चिनीमा कमिलो पस्यो, युवराज सफल पनि त्यसैगरी भित्र पर्यो अनि बिर्को लगाएको बट्टाबाट जसरी कमिला बाहिर निस्कियो त्यसैगरी बाहिर निस्कियो ।

कागजी बाघलाई महिनौंसम्म खोरमा थुन्न सकिन्छ तर वास्तविक बाघलाई धेरै समय खोरमा थुन्न सकिन्न चेतना भया । शाही अमेरिकी सरकारको एमसीसी विरोधी युवराज सफललाई फसाउने मिसन असफल भएको छ, विश्व शक्तिले हारेको छ, राष्ट्र, राष्ट्रियताले जितेको छ, म हिरासतमुक्त भएको छु ।