ओलीसहितको सार्वजनिक बहसको प्रस्तावमा बालेनको असहमति

---

काठमाडौँ । निर्वाचनको सरगर्मी बढ्दै जाँदा प्रमुख राजनीतिक दलका शीर्ष नेताबीच सार्वजनिक बहसको विषयले राजनीतिक बहसलाई थप चर्काएको छ। नेकपा (एमाले) का अध्यक्ष तथा पूर्वप्रधानमन्त्री केपी शर्मा ओलीले देश बनाउने र देश जलाउने शक्तिबीचको प्रतिस्पर्धाका रूपमा निर्वाचनलाई व्याख्या गर्दै सार्वजनिक बहसका लागि आफू तयार रहेको घोषणा गरेपछि त्यसमा प्रतिक्रिया आउन थालेको छ।

अध्यक्ष ओलीले सामाजिक सञ्जालमार्फत सार्वजनिक बौद्धिक वृत्तबाट पारदर्शी बहसको माग उठिरहेको उल्लेख गर्दै प्रधानमन्त्रीको उम्मेदवारका रूपमा अघि सारिएका सबै दल र नेताहरू एउटै मञ्चमा उभिएर एजेन्डा, विगतको काम र भविष्यको कार्ययोजनामाथि आमने–सामने बहस गर्न तयार रहेको बताएका थिए। सामाजिक सञ्जालमा ‘फ्रेमिङ’ गरिएका प्रचार सामग्रीमार्फत वास्तविकता लुकाउने प्रवृत्ति देखिएकाले यस्तो बहस आवश्यक भएको उनको भनाइ थियो।

ओलीको उक्त अभिव्यक्तिपछि काठमाडौँ महानगरपालिकाका पूर्वमेयर तथा राष्ट्रिय स्वतन्त्र पार्टीका वरिष्ठ नेता बालेन साहले भने सार्वजनिक बहसमा सहभागी नहुने स्पष्ट प्रतिक्रिया दिएका छन्। ओलीको स्टाटसमा टिप्पणी गर्दै बालेनले ओलीसँग एउटै मञ्चमा उभिन अस्वीकार गरेका हुन्।

बालेनले आफ्नो टिप्पणीमा विगतका घटनाको सन्दर्भ उठाउँदै ती घटनासँग जोडिएका व्यक्ति तथा मतियारसँग एउटै मञ्चमा उभिनु आफू त्यसमा संलग्न भएको अर्थ लाग्ने दाबी गरेका छन्। उनले यस्ता व्यक्तिसँग सार्वजनिक बहस गर्न नसकिने स्पष्ट पार्दै ओलीको प्रस्तावप्रति असहमति जनाएका छन्।