आठ सचिवको सरुवा, विवादित रामआधार पुनः खानेपानीमै पुगे

काठमाडौं । सरकारले आठ सचिवको सरुवा गरेको छ । सोमबारको मन्त्रिपरिषदबाट भएको सरुवाबारेमा कतिपय मन्त्रीहरु नै अनभिज्ञ रहेका छन् ।

सरुवामा तथ्यांक कार्यालयका सचिव मधुसुदन बुर्लाकोटीलाई उद्योग, बाणिज्य तथा आपूर्ति मन्त्रालयमा सरुवा गरिएको छ । मन्त्रालय नपाई बिदा हुन लागेका बुर्लाकोटीले न्याय पाएका छन् ।

उद्योग मन्त्रालयका सचिव कृष्णबहादुर राउत निर्वाचन आयोगमा पुगेका छन् । कामु प्रमुख निर्वाचन आयुक्त रामप्रसाद भण्डारीसँग कुरा मिलाएर उनी आयोगमा सरुवा भएर गएको चर्चा छ ।

विवादित सचिव रामआधार साहलाई दोस्रोपटक खानेपानी मन्त्रालयमा सरुवा गरिएको छ । उनी नेपाल ट्रष्टमा कार्यरत थिए । उनी यसअघि खानेपानी मन्त्रालयको सचिव हुँदा ठेकेदारसँग कमिसन मागेर मेलम्ची खानेपानी आयोजना अवरुद्ध गरेपछि तानिएका थिए ।

मुख्यसचिवको लबिङ गरेर पनि हुन नसकेकी खानेपानी मन्त्रालयकी सचिव प्रमीलादेवी बज्राचार्यलाई नेपाल ट्रस्टको कार्यालयमा पुर्याइएको छ ।

वन तथा वातावरण मन्त्रालयका सचिव राजेन्द्रकुमार मिश्रलाई कृषि तथा पशुपन्छी विकास मन्त्रालयमा पठाइएको छ । कृषि मन्त्रालयका सचिव डा. गोविन्दप्रसाद शर्मालाई वन तथा वातावरण मन्त्रालयतर्फ खटाइएको छ ।