हेटौंडा उपमहानगरपालिका क्षेत्रभित्र राजमार्गमा डोजर चल्यो, अस्थायी संरचना हटाउन सुरु

काठमाडौँ । सर्वोच्च अदालतले हेटौंडा उपमहानगरपालिका क्षेत्रभित्र राजमार्गमा निर्माण गरिएका अस्थायी टहरा तत्काल नहटाउन आदेश दिए पनि प्रशासनले शनिबार बिहानैदेखि डोजर चलाएर भत्काएकोे छ ।

हेटौँडा उपमहानगरपालिका क्षेत्रभित्र पर्ने राष्ट्रिय राजमार्गको सडक सीमा रेखादेखि २५–२५ गजभित्र बनेका स्थायी तथा अस्थायी प्रकृतिका घरटहरा हटाउन थालेको हो । १५ दिनको अल्टिमेटम शुक्रबार सकिएसँगै शनिबार बिहान ५ बजेदेखि घरटहरा हटाउन डोजर चलाएको छ । जिल्ला प्रशासन कार्यालय मकवानपुरले सर्वोच्च अदालतको आदेश प्राप्त नभएको भन्दै भत्काउन सुरु गरेको जनाएको छ ।

सडक विस्तारका लागि अस्थायी र स्थायी संरचना भत्काउन ५ सय सुरक्षाकर्मी र १० भन्दा धेरै डोजर परिचालन भएको छ ।

हेटौंडाको रातोमाटेदेखि बुद्धचोक हुँदै राप्ती पुलसम्म र बुद्धचोकबाट सामरी पुलसम्म सडक विस्तार शुरु भएको हो । २५ मिटर क्षेत्रमा परेका घर टहरा हटाउँदै हेटौँडामा राजमार्गको आवागमनसमेत वैकल्पिक व्यवस्था गरिएको छ । पूर्वमुख्यमन्त्री तथा एमाले नेता डोरमणि पौडेलको मेन रोड सिमाचोकमा रहेको घर पेन्टागन टावरमा पनि डोजर चलेको छ ।