माधव नेपाललाई झाँक्रीको कटाक्ष, आफ्नै बेइज्जती हुने कारबाहीको के अर्थ छ ?

 

काठमाडौं । नेकपा एकीकृत समाजवादी र माओवादी केन्द्रको एकता प्रक्रियामा सामेल नभएकी रामकुमारी झाँक्रीले आफूहरुमाथि गरेको कारबाहीको कुनै अर्थ नभएको बताएकी छन् । माधव नेपाललाई सम्बोधन गरी सामाजिक संजालमा झाँक्रीले नेपालले आफ्नै बेइज्जती हुने कारबाही नगरेको भए हुने उल्लेख गरेकी छन् । १९ बर्ष पार्टी प्रमुख र बाँकी समय पार्टी प्रमुखलाई चलाउने र नियन्त्रण गरेको स्मरण पनि झाँक्रीले नेपाललाई गराएकी छिन् ।

उनी लेख्छिन्– प्रिय कमरेड माधव नेपाल, अभिवादन !

आफ्नै बैज्जती हुने कारबाही त नगरेको भए पनि हुने कमरेड ? केही अर्थ छ र अब पनि कारबाहीको ? लोकले के भन्ला भन्ने पनि लागेन र ? तपाई सबै कालखण्ड गरेर १९ वर्ष पार्टी प्रमुख, बाँकी समय पार्टी प्रमुखलाई चलाउने र नियन्त्रण गर्ने जिम्मेदारीमा बसेर काम गर्नुभयो । यो अन्तिम घटनाले तपाईंको ईतिहासलाई फेरि बल्झायो । विर्सेकाहरूले सबै घटना स्मृतिमा लिने भए ।

जिन्दगीमा के लानु छ कमरेड ? समाज र देशका लागि जीवन–जवानी अर्पण गरेको ब्यक्तिले । लाने त यति त हो एउटा मिठो वा तितो स्मृति, चियापसलमा पुग्दा बोल्ने दुई जना मान्छे । आफ्नै मलामी त कसले पो देख्छ र ? हार्दिक धन्यवाद यो अन्तिम कर्मको लागि ।

बाँकी जीवने सुखद होस्, परिवारमा शान्ति र सुस्वास्थ्यका हार्दिक शुभकामना । तपाईं जहाँ रहे पनि हाम्रो अभिभावको हो । मैले यसरी सधंै सम्झनेछु ।