महेश बस्नेतलाई माधव नेपालको चिन्ता, भने–बोको लिएर एमालेमा फर्के हुन्छ

काठमाडौं । जेनजी प्रदर्शनपछि भक्तपुरको गुण्डुमा सीमित भएका एमालेका पोलिटब्यूरो सदस्य महेश बस्नेतले नेकपा एकीकृत समाजवादीका अध्यक्ष माधवकुमार नेपालको चिन्ता गरेका छन् ।

नेकपा एकीकृत समाजवादी र नेकपा माओवादी केन्द्रको एकता हुने भएपछि बस्नेतलाई चिन्ता लागेको छ । उनले समाजवादी एमालेबाट हात्ती लिएर गएको तर अहिले बोको लिएर एमालेमा फर्के हुन्छ भनेर सामाजिक संजालमा लेखेका छन् ।

बस्नेतले लेखेका छन्–‘माधव नेपाल ठूलो तनावमा भन्ने सुनियो ! नेकपा (माओवादी केन्द्र) सँग एकता गर्ने पक्कापक्की निर्णय बाहिरिएपछि, उनका आफ्नै पार्टीका नेताहरू र कार्यकर्ताहरूले विरोध गर्दै एमालेसँग एकता गर्न दबाब दिन थालेका छन् ।

जनताको बहुदलीय जनवाद त्यागेर माओवादीसँग जाने कुरा आधाभन्दा धेरै कार्यकर्ताले स्वीकार नगर्ने भएपछि माधवको स्थिति झनै जटिल बन्दै गएको छ ।
एमाले विभाजित गराएर देशलाई धोका दिएर गएका माधव नेपालले माओवादीमा आफ्नो पार्टी विलय गराउनुभन्दा हात्ती लिएर गएका हुन् बरु बोको लिएर एमालेमा फर्के हुन्छ ।’