केपी ओली र विद्या भण्डारीबीच टेलिफोन वार्ता

काठमाडौं । नेकपा (एमाले) का अध्यक्ष केपी शर्मा ओलीले पूर्वराष्ट्रपति विद्यादेवी भण्डारीबीच टेलिफोन वार्ता गरेका छन् ।

वार्तामा पछिल्लो राजनीतिक घटनाक्रमका विषयमा कुराकानी भएको छ । यद्यपि भण्डारीको सदस्यता नवीकरणको विषय भने वार्तामा नउठेको बताइएको छ ।

भण्डारी समक्ष ओलीले विद्यमान बिषम अवस्थामा आफूलाई सहयोग गर्न आग्रह गरेका थिए । उनले भने– ‘यतिबेला मलाई तपाईँको सहयोगको आवश्यकता छ । मलाई सहयोग गर्नुहोस् ।’

जवाफमा भण्डारीले सहयोग आदानप्रदानको कुरा एक ठाउँमा हो भन्दै नेतृत्व सहजीकरण गर्न सुझाएकी थिइन् । ओलीले आफूमाथि राष्ट्रिय–अन्तर्राष्ट्रिय प्रतिक्रियावादी शक्तिको प्रहार भएको बताउँदा भण्डारीले अहिले पनि विदेशी शक्तिको नाम लिनुको साटो पछिल्लो आन्दोलनको सन्देश र संकेत अनुसार अघि बढ्न सुझाएकी थिइन् ।