ओली सरकार पत्रकारको सलसँग पनि डरायो

काठमाडौं । संसद विघटनपछि प्रधानमन्त्री तथा मन्त्रीहरु बाहिरी जिल्लाका कार्यक्रममा जाँदा कालो झण्डाको सामना गरिरहेका छन् ।

प्रधानमन्त्रीले संसद विघटन गरेर देशलाई अस्थिरतातर्फ धकेलेको भन्दै नेकपाको प्रचण्ड–नेपाल समूह र कांग्रेसलगायत दलका नेता कार्यकर्ताहरुले विभिन्न जिल्लामा सरकारका मन्त्रीहरुलाई कालो झण्डा देखाउने गरेका छन् ।

आइतबार चितवनमा हुने कार्यक्रममा पनि प्रधानमन्त्री केपी शर्मा ओलीलाई कालो झण्डाको त्रास थियो । त्यसैले विशेष सुरक्षाको टोलीलाई खटाइएकाे थियाे । कालाे झण्डाकाे डरकै कारण पत्रकारले घाँटीमा लगाएकाे कालो सल समेत निकाल्न लगाइएकाे छ।

चितवनको पुल्चोक गोन्द्राङ सडक बिस्तारको शिलान्यास गर्ने कार्यक्रमको रिपोर्टिङ गर्न गएकी पत्रकार शान्ता अधिकारीको सल सुरक्षा टोलीले निकाल्न लगाएको हो । भरतपुर एयरपोर्टमा पुगेकी अधिकारीले आफू पत्रकार भएको परिचय दिँदा समेत सुख पाएकी थिइनन् ।

‘प्रधानमन्त्री सुरक्षाको विशेष टोलीले शान्ता जिलाई निक्कै निगरानी गरेको थियो, निगरानी गर्नुको एउटै कारण उनको कालो सल पो रहेछ’, पत्रकार अनिल ढकालले भने ‘अन्तमाः घाटीको सल निकाल्नै लगाइयो । सल निकालेपछि अधिकारीले झोलामा राखेकी थिइन् ।’