प्रदेश सांसद सरोजकुमार पक्राउ, उपभोक्ता समितिहरु गठन गरेको देखाउँदै खातामा रकम हालेको आरोप

काठमाडौं । अख्तियार दुरुपयोग अनुसन्धान आयोगले मधेस प्रदेश सभा सदस्य सरोजकुमार सिंहलाई बिहीबार रत्नराज्य स्कुल मध्येबानेश्वरबाट नियन्त्रणमा लिएको छ ।

बिभिन्न उपभोक्ता समितिहरु गठन गरेको देखाई उक्त उपभोक्ता समितिका खातामा दाखिला भएको रकम आफ्नो निजी सचिव बिनोदकुमार लाल कायस्थ मार्फत् झिकी झिक्न लगाई उक्त रकम आफ्नो र श्रीमतीको खातामा बैंक दाखिला गर्न लगाएको देखिएपछि उनलाई नियन्त्रणमा लिएको जनाएको छ ।

सिंहका निजी सचिव कायस्थसमेतको खातामा रकम जम्मा गरी सरकारी रकम दुरुपयोग गरी भ्रष्टाचारजन्य कार्य गरेको उजुरीका आधारमा सरोजकुमार सिंहलाई नियन्त्रणमा लिएको आयोगको विज्ञप्तिमा उल्लेख छ । सिंहको बारेमा अख्तियारले अनुसन्धान गरिरहेको छ ।

सिंह महोत्तरी क्षेत्र नम्बर ४ को प्रदेश ख बाट निर्वाचित भएका प्रदेश सांसद हुन् । उनी जनता समाजवादी पार्टीबाट निर्वाचित भएका हुन् ।