पतञ्जली जग्गा प्रकरणमा रघु पन्त र पदमा अर्याल पनि संलग्न छन् : रामचन्द्र झा

काठमाडौं । पतञ्जली योगपीठलाई हदबन्दीभन्दा बढी जग्गा किनबेच गर्न छुट दिंदा भ्रष्टाचार गरेको आरोपमा अख्तियार दुरुपयोग अनुसन्धान आयोगले पूर्वप्रधानमन्त्री माधवकुमार नेपालसहित ९३ जनाबिरुद्ध मुद्दा दायर गरेपछि देश तरंगित छ ।

माधव नेपाल प्रधानमन्त्री हुँदा पतञ्जलीलाई हदबन्दीभन्दा बढी जग्गा किनबेच गर्न दिँदा मन्त्रिपरिषदको बिधायन समितिबाट निर्णय भएको थियो । बिधायन समितिमा रहेका मन्त्रीहरुलाई भने अख्तियारले मुद्दा दर्ता गरेको छैन । माधव नेपाल प्रधानमन्त्री हुँदा उनका प्रमुख राजनीतिक सल्लाहकार रहेका रघुजी पन्त वर्तमान शिक्षामन्त्री छन् । पन्तको सल्लाहबिना माधव नेपालले कुनै पनि निर्णय गर्दैनथे ।

पतञ्जलीलाई हदबन्दीभन्दा बढी जग्गा दिने र लगत्तै त्यो जग्गा बेचेर अर्को जग्गा खरिद गर्न दिने निर्णय पन्तको सल्लाहमै भएको नेकपा एकीकृत समाजवादीका नेता रामचन्द्र झाले बताएका छन् । सोमबार नेकपा एकीकृत समाजवादी जनकपुर नगरद्वारा आयोजित एक कार्यक्रममा झाले शिक्षामन्त्री पन्त त्यतिबेला राजनीतिक सल्लाहकार थिए । उनकै सल्लाहमा प्रधानमन्त्रीले पतन्जलीलाई जग्गा दिने निर्णय गरेका हुन् ।

आचार्य बालकृष्णको नाता समेत पर्ने एमालेकी सचिव पद्मा अर्यालले समेत माधव नेपाललाई उक्त जग्गा पतन्जलीलाई दिन रातदिन दबाब दिएको कुरा जगजाहेर छ । तर जग्गा दिन दबाब दिने एमालेका नेताहरुलाई जोगाएर पन्तजलीमा माधव नेपाललाई फसाउने एमाले अध्यक्ष केपी शर्मा ओलीले गरेको आरोप झाले लगाएका छन् । पतन्जली योगपीठका ट्रष्टी शालिग्राम सिंह नेपाली कांग्रेसका हुन् । उनले पतन्जलीलाई जग्गा दिलाउन तत्कालीन उपप्रधान तथा परराष्ट्रमन्त्री सुजाता कोइरालामार्फत् दबाब दिएका बताएका छन् । उनी भन्छन्–शालिग्राम सिंह नटवरलाल हुन् । उनी नेपाली कांग्रेसबाट समानुपातिक सांसदमा सिफारिसमा परेका ब्यक्ति हुन् ।