गृह मन्त्रालयका सहसचिव भट्टराई अख्तियारको नियन्त्रणमा

काठमाडौं । अख्तियार दुरुपयोग अनुसन्धान आयोगले नेपाल सरकारका एक सचिवलाई नियन्त्रणमा लिएको छ। अख्तियारले गृहमन्त्रालयका सहसचिव तीर्थराज भट्टराईलाई आज (बुधबार) नियन्त्रणमा लिई टंगाल लगेको हो।

भट्टराईलाई मंगलबारमात्रै बढुवा गरेर गृहमन्त्रालयमा ल्याइएको थियो। यसअघि उनी त्रिभुवन अन्तर्राष्ट्रिय विमानस्थल कार्यालयका प्रमुख अध्यागमन अधिकृत थिए। उनको ठाउँमा पाँचथरका प्रमुख जिल्ला अधिकारी रहेका विष्णु कोइरालालाई पठाइएको छ।

भिसिट भिसामा जानेसँग रकम उठाएको उजुरी परेपछि केहीबेरअघि मात्रै अख्तियारको टोलीले अध्यागमन कार्यालयमा छापा मारेको थियो। स्रोतका अनुसार अहिले अख्तियार कार्यालयमा भट्टराईसँग बयान भइरहेको छ ।

अध्यागमन कार्यालयमा छापा मारेर अख्तियारको टोलीले कम्प्युटर र विभिन्न डिभाइसहरू नियन्त्रणमा लिएको छ।

सम्बन्धित समाचार : त्रिभुवन विमानस्थलको अध्यागमन कार्यालयमा अख्तियारको छापा