रवीन्द्र र दुर्गालाई म्याद थपका लागि आज फेरि अदालत लगिँदै

काठमाडौं । गत १५ चैतमा तीनकुनेमा भएको हिंसात्मक प्रदर्शनपछि पक्राउ परेका राप्रपा नेता रवीन्द्र मिश्र र उक्त प्रदर्शनका ‘जनकमाण्डर’ दुर्गा प्रसाईंविरुद्ध अनुसन्धान नसकिएको भन्दै प्रहरीले समय थपका लागि आज अदालतमा उपस्थित गराउने तयारी गरेको छ ।

१४ वैशाखमा ७ दिन हिरासतमा राखेर अनुसन्धान गर्न भन्दै दिएको म्याद आज सकिँदैछ । तर, सय अवधिमा अनुसन्धान नसएिको भन्दै पुनः अनुमति माग्न अदालतमा उपस्थित गराउन लागिएको जिल्ला प्रहरी परिसर, काठमाडौंका एसपी अपिल बोहोराले बताए । उनका अनुसार आज उनीहरुलाई जिल्ला अदालत, काठमाडौंमा उपस्थित गराइने छ ।

तीनकुनेमा भएको राजावादी समर्थकको प्रदर्शनका जनकमाण्डर तोेकिएका प्रसाईंविरुद्ध कर्तव्य ज्यानसहित ज्यान मार्ने उद्योग, आपराधिक उपद्रव, संगठित अपराध र राजद्रोहको कसुरमा प्रहरीले अनुसन्धान गरिरहेको छ ।

यस्तै, मिश्रलाई राजद्रोह र संगठित अपराधको मुद्दा चलाइएको छ । मिश्र १५ चैतमै पक्राउ परेका थिए भने प्रसाईंलाई प्रहरीले भारतबाट पक्राउ गरेर ल्याइएको थियो । मिश्रसँगै पक्राउ परेका राप्रपा सांसद् धवलशमशेर राणालाई भने प्रहरीले स्वास्थ्यलाई कारण दुई साताअघि नै छाडिसकेको छ ।