युवामा आशा जगाउने नीति तथा कार्यक्रम ल्याउन सत्तारुढ दलको सुझाव

काठमाडौं । सत्ता गठबन्धनमा रहेको दलहरूले आगामी आर्थिक वर्ष २०८२र०८३ को वार्षिक नीति तथा कार्यक्रम विशेषगरी युवालाई आशा जगाउने गरी ल्याउन सुझाव दिएका छन्।

आज (बुधबार) प्रधानमन्त्री निवास बालुवाटारमा बसेको सत्ता गठबन्धनको बैठकपछि जानकारी दिँदै नेकपा एमालेका उपमहासचिव प्रदीप ज्ञवालीले युवापुस्तामा आशा जगाउनेगरी कार्यक्रम ल्याउन सुझाव प्राप्त भएको बताए।

‘खास गरी युवापुस्तामा आशा र विश्वास जगाउनको निम्ति उनीहरूमा उद्यमशीलता, सीप विकास, स्टार्टअप, व्यावसायिक प्लान र बजार संरक्षणको समग्र योजनासहितको कार्यक्रम आओस् भन्ने पनि दलहरूले सुझाव दिनुभएको छ,’ उनले भने।

ज्ञवालीले लोकतन्त्रलाई थप सुदृढ गर्ने र यसमाथि विभिन्न कोणहरूबाट भइरहेका हमला तथा आक्रमणहरूलाई सामूहिक रूपले जवाफ दिने विषयमा पनि सुझाव प्राप्त भएको जानकारी दिए।

त्यस्तै विकास निर्माणलाई प्रभावकारी, समयमा सकिने र उच्च प्राथमिकीकरण गर्नुपर्ने सुझावहरु पनि प्राप्त भएका थिए। त्यस्तै युवा लक्षित उद्यमशीलता, सीप विकास, स्टार्टअप, व्यावसायिक प्लान र बजार संरक्षणको समग्र योजनासहितको कार्यक्रम आओस् भन्ने पनि सत्ता सहयात्री दलहरूले सुझाव दिएको ज्ञवालीले जानकारी दिए।

सरकारले १९ गते संसद्‍मा नीति तथा कार्यक्रम प्रस्तुत गर्दै छ। त्यसबारे छलफल गर्न बोलाइएको बैठकमा सत्तापक्षीय दलहरु सहभागी थिए।