नेपालद्वारा जम्मु कश्मिरमा भएको आतंकवादी हमलाको निन्दा

काठमाडौं । प्रधानमन्त्री केपी शर्मा ओलीले भारतको जम्मु कश्मिरमा भएको आतंकवादी आक्रमणमा परी ज्यान गुमाउनेहरुप्रति गहिरो समवेदना प्रकट गरेका छन् । प्रधानमन्त्री ओलीले आतंकवाद विरुद्धको लडाइँमा भारतसँग दृढ ऐक्यबद्धता जनाउँदै यस्ता सबै किसिमका आतंकवादी कार्यहरूको कडा भत्र्सना गरेका छन् ।

ओलीले सामाजिक सञ्जाल एक्समा लेखेका छन्, ‘पहलगाममा भएको आतंकवादी आक्रमणमा परेका सबैप्रति गहिरो समवेदना प्रकट गर्दछौं । नेपालले भारतसँग दृढ ऐक्यबद्धता जनाउँछ र सबै किसिमका आतंकवादी कार्यहरूको कडा निन्दा गर्दछ ।’ आक्रमणमा नेपाली नागरिक परेको आशंकासम्बन्धी रिपोर्टहरूका बारेमा सरकारले भारतीय पक्षसँग समन्वय गरिरहेको प्रधानमन्त्री ओलीले बताएका छन् ।

‘आक्रमणमा नेपाली नागरिक परेको आशङ्कासम्बन्धी रिपोर्टहरूका बारेमा नेपाल सरकार भारतीय पक्षसँग समन्वयमा रहेको छ’ उनले लेखेका छन्, ‘पीडितमध्ये एक नेपाली नागरिक हुन सक्ने रिपोर्टबारे प्रमाणीत गर्न नजिकबाट समन्वय भइरहेको छ र आवश्यक सम्पूर्ण सहायता उपलब्ध गराइनेछ ।’

साथै, परराष्ट्र मन्त्रालयले आज एक विज्ञप्ति जारी गर्दै शोकसन्तप्त परिवारहरूप्रति गहिरो समवेदना तथा घाइतेहरूको शीघ्र एवं पूर्ण स्वास्थ्यलाभको कामना गरेको छ । ‘नेपाल दुःखको यो घडीमा भारत सरकार र त्यहाँका जनतासँग दृढ ऐक्यबद्धता प्रकट गर्दछ । नेपाल सबै प्रकारका आतङ्कवादको निन्दा गर्दछ । यो हाम्रो दृढ अडान हो । आतङ्कवादका यस्ता जघन्य कार्य सर्वदा अनुचित छन्’, विज्ञप्तिमा भनिएको छ ।

भारतीय सञ्चारमाध्यमहरूका अनुसार उक्त आक्रमणमा परी २६ जनाको ज्यान गएको छ भने अन्य १७ जना घाइते भएका छन् । ज्यान गुमाउनेमा एक जना नेपालीसमेत रहेका छन् ।