प्रचण्ड-नेपाल पक्षद्वारा मुख्यमन्त्री राईसहित ८ जनालाई २४ घण्टे स्पष्टीकरण

मोरङ । नेपाल कम्युनिस्ट पार्टी (नेकपा) प्रचण्ड-नेपाल समूहले प्रदेश १ का मुख्यमन्त्री शेरधन राईलगायत आठ जनालाई स्पष्टीकरण सोधेको छ ।

पुस १५ गते संसदीय दलको नेताबाट मुख्यमन्त्री राईलाई हटाएर भीमप्रसाद आचार्यलाई चयन गरेपछि पुस १९ गते बसेको संसदीय दलको बैठकमा उपस्थित नभएको र पार्टी हितविपरीत काम गरेको भन्दै २४ घण्टाभित्र स्पष्टीकरण दिन भनेको हो ।

मुख्यमन्त्री राई, आन्तरिक मामिला तथा कानुनमन्त्री हिक्मतकुमार कार्की, भूमि व्यवस्था, कृषि तथा सहकारी राज्यमन्त्री रामबहादुर मगर, भौतिक पूर्वाधार विकास राज्यमन्त्री अम्बिरबाबु गुरुङ, प्रमुख सचेतक बुद्धिकुमार राजभण्डारी, प्रदेश सभा सदस्यत्रय इन्द्रमणि पराजुली, अम्बिका थापा र विमल कार्कीलाई स्पष्टीकरण सोधिएको उपनेता टंक आङ्बुहाङले बताए ।

मुख्यमन्त्री राई निकट उद्योग, पर्यटन, वन तथा वातावरणमन्त्री जगदीशप्रसाद कुसियैतलाई भने स्पष्टीकरण सोधिएको छैन । सचेतक सौभाग्य राईद्वारा हस्ताक्षरित पत्र हुलाकबाट पठाएको उपनेता आङ्बुहाङले बताए ।

दलको बैठक बोलाउने संसदीय दलको विधानले प्रमुख सचेतकलाई रहेको तर बैठक उपनेताले बोलाउनु नै विधान विपरीतको कार्य भएको प्रमुख सचेतक राजभण्डारीले बताए ।

पुस १९ गते आफू दिनभरि संसदीय दलको कार्यलयमा बसिरहँदा पनि कोही नआएको अवस्थामा कहाँ बैठक बसेको भनी उनले प्रतिप्रश्न गरे । बैठक नै नबसी कोठे निर्णयका आधारमा एउटा पत्र लेख्दैमा स्पष्टीकरण सोधिन नमिल्ने राजभण्डारीको भनाइ थियो । उनले दलको विधानअनुसार दलको नेता मुख्यमन्त्री राई रहेको बताए ।

प्रचण्ड–नेपाल समूहले पुस १२ गते मुख्यमन्त्री राईविरुद्ध अविश्वासको प्रस्ताव दर्ता गराएको छ । उक्त प्रस्तावमा हस्ताक्षर गरेकामध्ये मुख्यमन्त्री राईले स्पष्टीकरण सोधी जवाफ नदिने १६ जनालाई तीन महिनाका लागि निलम्बन गरिसकेको छ ।