ओली सरकारका पूर्वमाओवादी मन्त्रीहरुमा गाली गर्ने होडः नयाँ जोगीले खरानी घसेजस्तै

काठमाडौं । प्रधानमन्त्री केपी ओलीले आफ्नो स्वार्थका लागि प्रतिनिधिसभा बिघटन गरी विशाल नेपाल कम्युनिष्ट पार्टी पनि विभाजन गरे । उनले पुष्पकमल दाहाल ‘प्रचण्ड’लाई कमजोर बनाउन पूर्वमाओवादी केन्द्रका नेताहरुलाई ल्याएर आफ्नो मन्त्रिपरिषदमा राखेका छन् । पूर्वमाओवादीका तर्फबाट गृहमन्त्री भएका रामबहादुर थापाले बादल ओलीलाई नै साथ दिए । उनले आफ्ना सल्लाहकार सूर्य सुवेदी पथिक र आफ्नो टीममा सँगै आएका एक जना पनि ओली समूहमा तान्न सकेनन् ।

डुब्न लागेको बेला सिन्काको सहारा भनेझैं ओलीले भर्ति गरेका पूर्वमाओवादीका मन्त्रीहरुको दैनिकी अहिले प्रचणडलाई गालीगलौज गर्ने रहेको छ । स्वयं प्रधानमन्त्रीले नै उनीहरुलाई गालीगलौज गर्नकै लागि आफ्नो समूहको भेला र बैठकमा पठाउने गरेका छन् । ओलीको प्रतिगमनमा साथ दिएर मन्त्री पदमा रमाएका टोपबहादुर रायमाझी, लेखराज भट्ट, प्रभु साह, दावा लामा र मणिचन्द्र थापाको दैनिकी नै केही दिनयता प्रचण्डलाई गाली गर्ने हुँदैआएको छ ।

ओलीका यी मन्त्रीको भाषण सामाजिक संजालमार्फत् सुन्नेहरुले २०६१ ताका राजा ज्ञानेन्द्रको मन्त्रिमण्डलका सदस्य श्रीशसमशेर राणा,  निक्षशमशेर राणाहरुलाई झलझली सम्झिरहेका छन्. । त्यतिबेला उनीहरु भन्ने गर्थे, महाराजाको कदम ठीक छ, राजनीतिक दलहरुको शासनमा भ्रष्टाचार ब्याप्त भएकाले र देशको अस्तित्व नै संकटमा पर्न लागेकाले श्री ५ ले यो कदम चालिबक्सेको हो ।

यही शैलीमा बादल, रायमाझी, भट्ट र साहले भन्ने गरेका छन्–प्रधानमन्त्रीलाई प्रचण्ड–माधवले काम गर्न दिएनन्, त्यही भएर प्रधानमन्त्री ओलीले प्रतिनिधिसभा बिघटन गर्नुपरेको हो । हुँदाहुँदा ऊर्जा मन्त्री भएका टोपबहादुर रायमाझीले त लोडसेडिङ नै कुलमान घिसिङले होइन, आफूले हटाएको दाबी गर्न थालेका छन् ।  यी र यस्ता गालीगलौजका बर्षा ओलीले भर्ति गरेका रायमाझीदेखि थापासम्मले गर्दैआएका छन् । ओली समूहमा रहेका एमाले पृष्ठभूमिका मन्त्रीहरु भन्दा एक कदम अघि बढेर माओवादीका मन्त्रीहरुले प्रचण्ड–नेपाल समूहलाई गाली गर्न थालेका छन् । नयाँ जोगीले खरानी घस्छ भन्ने उखान सायद ओलीका अहिलेका यी मन्त्रीजस्तै पात्रहरुलाई लिएर बनाइएको होला ।