प्यूठानबाट मतदातासँग माफी माग्दै गगन थापाले भने- सरकारमा चकचक र उपद्रो गर्दैनौँ

काठमाडौं – नेपाली कांग्रेसका महामन्त्री गगन कुमार थापाले मतदातासँग माफी मागेका छन् ।

सोमबार प्युठानमा आयोजित सभालाई सम्बोधन गर्ने क्रममा महामन्त्री थापाले अघिल्लो निर्वाचनमा मतदातालाई फरक चिन्हमा मतदान गर्न लगाएकोमा माफी मागेका हुन् ।

‘अघिल्लो निर्वाचनमा यहाँ पनि हामीले गिलास चिन्हमा मतदान गर्न लगायौं । म यहाँका मतदातासँग माफी माग्न चाहन्छु,’ महामन्त्री थापाले भने ।
उनले अबको निर्वाचनमा यस्तो गल्ती नगर्ने पनि बताए । ‘हामीले अघिल्लोपटक गल्ती गर्‍यौं, अब यस्तो गल्ती दोहोर्‍याउँदैनौं,’ थापाले भने ।

उनले आफूहरुले सरकारमा बसेर चकचक नगर्ने बताउँदै भने, ‘प्रचण्ड प्रधानमन्त्री बन्नुभयो । पाँच वर्ष चलोस् भन्ने चाहेका थियौँ । हामीले बेइमानी गरेका होइनौँ । उहाँले नै कांग्रेसलाई छाडेर एमालेसँग जानुभयो । अहिले हामी एमालेसँग मिलेर सरकार चलाएका छौँ । हामी इमान्दार भएर सरकार चलाउछौँ । हामी चकचक र उपद्रो गर्दैनौँ सरकारका बारेमा ।’