ठमेलमा प्रहरी कुट्ने अनेरास्ववियुका नेता जोशी पक्राउ

काठमाडौं । ठमेलस्थित छायाँसेन्टर अगाडि प्रहरीमाथि कुटपिट गरेको आरोपमा अनेरास्ववियुका नेता कमल जोशी पक्राउ परेका छन् । उनलाई प्रहरीले बिहीबार साँझ नयाँ बानेश्वरबाट पक्राउ गरेको हो ।

प्रहरी कुट्ने अन्य दुई विद्यार्थी नेता पक्राउ परिसकेका छन् । ताप्लेजुङको फुङलिङ नगरपालिका १ घर भई हाल काठमाडौँको लैनचौर बस्ने २५ वर्षका दिनेश सिग्देल र डडेलधुराको गन्यापधुरा गाउँपालिका ५ घर भई लैनचौरमै बस्ने २२ वर्षका रमेश फुलारालाई प्रहरीले पक्राउ गरिसकेको छ ।

जोशीले प्रहरी नकुटेको भन्दै जोगाउन खोजेको भनेर मिडियामा बिरोध भएपछि प्रहरीले उनलाई पक्राउ गरेको छ । सीसीटीभी फुटेजमा जोशीले प्रहरी कुट्ने अन्य विद्यार्थी नेतालाई छुट्याएकाले उनलाई पक्राउ गरिएको थिएन । तर चौतर्फी बिरोध भएपछि उनलाई प्रहरीले पक्राउ गरेको छ ।

पक्राउ परेका सबैलाई प्रहरी वृत्त दरबारमार्गको हिरासतमा राखिएको छ । माघ २४ गते उनीहरूको समूहले प्रहरी वृत्त दरबारमार्गको क्वीक रेस्पोन्स टीम (क्युआरटी) माथि आक्रमण गरेको थियो ।

यसअघि पक्राउ परेका सिग्देल र फुलारालाई अभद्र व्यवहारको कसुरमा प्रहरीले अनुसन्धान थालेको छ ।