नेसपाको अध्यक्षमा २ उम्मेदवार, बाबुरामलाई नेत्रप्रसादले दिए चुनौती

काठमाडौं – नेपाल समाजवादी पार्टी (नेसपा) नयाँशक्ति पार्टीमा आज नेतृत्व चयन गरिँदै छ । काठमाडौंमा आइतबारदेखि सुरु भएको महाधिवेशनमा आज नेतृत्व चयन गर्न लागिएको हो ।

नेसपाको अध्यक्षमा डा. बाबुराम भट्टराई र नेत्रप्रसाद चापागाईंको उम्मेदवारी दर्ता भएको छ । नेसपाको अध्यक्षमा डा भट्टराईलाई पार्टीका संस्थापक सदस्य चापागाईंले चुनौति दिएका हुन् । चापागाईं अन्नपूर्ण गाउँपालिका-६ कास्कीका हुन् । उनको प्रस्तावकमा गोरखा अजिरकोटका कृष्ण अधिकारी प्रस्तावक र कास्की-२७, पोखराका विशाल तिमिल्सिना समर्थक छन् ।

त्यसैगरी दलित उपाध्यक्षमा दूर्गा सोब र महिला उपाध्यक्षमा मानुषी यमी भट्टराइको एकल उम्मेदवारी परेको छ । ११ जना पदाधिकारी र ९९ जना केन्द्रीय सदस्यमध्ये ९० जनाको लागि आज निर्वाचन हुँदै छ ।

अध्यक्षसहित ९९ सदस्यीय कार्यसमिति चयनका लागि आज दिउँसो ३ बजेदेखि मतदान सुरु गर्ने तयारी छ । आज बिहान १० बजेदेखि मतदान सुरु गर्ने भनिए पनि राति अबेरसम्म मनोनयन दर्ताको कार्यक्रम भएकाले समय संशोधन गरिएको हो ।